2022 jyldan bastap oqýǵa túsken medıtsına mamandary jańa júıe boıynsha jumys isteıdi
ASTANA. KAZINFORM - Densaýlyq saqtaý mınıstrligi jas mamandardyń patsıenttermen erterek jumys isteýin qamtamasyz etý jáne olardyń klınıkalyq praktıkaǵp daıarlyǵyn arttyrý maqsatynda dárigerlerdi daıarlaý júıesin jańartýdy josparlap otyr.
Mınıstrliktiń baspasóz qyzmetiniń habarlaýynsha, tıisti normalar bıylǵy 29 sáýirde Qazaqstan Respýblıkasy Parlamentiniń Májilisinde talqylaýy bastalǵan zań jobasynda qarastyrylǵan.
Ózgerister 2022 jyldan bastap medıtsınalyq joǵary oqý oryndaryna túsken stýdentterge qatysty bolady. Buǵan deıin qabyldanǵan stýdentter úshin oqý sharttary ózgerissiz qalady: olar qoldanystaǵy baǵdarlamalar boıynsha bilim alyp, belgilengen tártippen mamandyqqa shyǵady.
Reformalardyń qajettiligi qoldanystaǵy daıarlaý modelindegi shekteýlermen baılanysty. Qazirgi ýaqytta oqý uzaqtyǵy 6 jyldy quraıdy, oǵan ınternatýra men magıstratýra elementteri kiredi, alaıda túlekterdiń praktıkalyq daıarlyǵy jetkiliksiz deńgeıde qalyp otyr.
Sonymen qatar, dıplom alǵannan keıin túlekter rezıdentýradan ótpeı dáriger retinde jumys isteýge quqyly emes, al rezıdentýraǵa bólinetin granttar sany shekteýli. Bul jaǵdaı kóp jyldyq oqýǵa qaramastan, keıbir túlekterdiń birden kásibı qyzmetin bastaı almaýyna ákeledi.
Reforma sheńberinde barynsha logıkalyq jáne praktıkaǵa baǵyttalǵan modelge kóshý usynylady. 2022 jyldan bastap oqýǵa túsken túlekter oqýyn jáne ınternatýrany aıaqtaǵannan keıin rezıdentýradan mindetti túrde ótpeı-aq eńbek qyzmetin bastaı alady.
Olarǵa alty bazalyq baǵyt: jalpy dárigerlik praktıka, terapııa, pedıatrııa, hırýrgııa, akýsherııa jáne gınekologııa, balalar hırýrgııasy boıynsha jumys isteý quqyǵy beriledi.
- Oqytý mazmuny da eleýli túrde ózgeredi. Internatýra tolyqqandy klınıkalyq praktıka mártebesine ıe bolady: ıntern-dáriger tálimgerdiń jetekshiligimen jumys istep, patsıentterdi emdeýge qatysady, medıtsınalyq aqparattyq júıelerge qol jetkizedi jáne eńbekaqy alady. Osylaısha, ınternatýra formaldy kezeń bolýdan qalyp, daıarlaý júıesiniń negizgi elementine aınalady, -delinen habarlamada.
Sondaı-aq onda rezıdentýra saqtalatyny, alaıda onyń róli ózgeretini aıtylǵan. Endi ol tar beıindi mamandaný úshin tereńdetilgen daıarlyq kezeńi bolady.
Mınıstrlikte atap ótkendeı, engiziletin ózgerister dárigerdiń kásibı damýynyń túsinikti ári júıeli traektorııasyn qalyptastyrýǵa, jas mamandardyń densaýlyq saqtaý júıesine tezirek qosylýyna jáne kadrlyq áleýetti, ásirese medıtsınalyq-sanıtarııalyq alǵashqy kómek deńgeıinde jáne óńirlerde kúsheıtýge múmkindik beredi.
Reformalardyń basty maqsaty – medıtsınalyq kómektiń sapasyn arttyrý. Mınıstrlikte atap ótkendeı, patsıent úshin dárigerdiń tek dıplomynyń bolýy ǵana emes, onyń praktıkalyq jumysqa daıyn bolýy asa mańyzdy.
Osyǵan deıin medıtsına mamandary men patsıentterdiń qaýipsizdigin qamtamasyz etý jospary jasalatyny týraly jazdyq.
