2022 jyldan bastap bıznes-ıdeıalardy iske asyrýǵa 40 myńǵa jýyq grant berildi

ASTANA. KAZINFORM – 2022 jyldan bastap halyqtyń áleýmettik osal toptaryna jatatyn azamattarǵa jumyspen qamtýǵa járdemdesýdiń belsendi sharalaryn kórsetý sheńberinde jańa bıznes-ıdeıalardy iske asyrý úshin 39 763 grant berildi.

Eńbek jáne halyqty áleýmettik qorǵaý mınıstrligi málimetinshe, granttardyń jalpy sanynyń úshten bir bóliginen astamyn kópbalaly otbasylar aldy. Sońǵy úsh jylda barlyǵy 38 myń grant berý josparlanǵan bolatyn. Grant alýshylardyń sanattary bólinisinde 16 734 grant kóp balaly otbasylarǵa, 5 142 grant – múgedektigi bar adamdarǵa, 3 498 – múgedektigi bar balalardy tárbıelep otyrǵan ata-analarǵa, 1 611 – ataýly áleýmettik kómek alýshylarǵa, 1 024 – asyraýshysynan aıyrylý boıynsha tólem alýshylarǵa, 11 754 – basqa sanattarǵa berildi.

Granttardyń eń kóp sany Qyzylorda (6,5 myń), Túrkistan (6,4 myń) jáne Jambyl (4,7 myń) oblystarynda, eń az sany – Ulytaý (286) jáne Qostanaı oblystarynda (963) berildi.

Óteýsiz granttar: mal sharýashylyǵyna – 13 467, ósimdik sharýashylyǵyna – 474, qajetti múkámmaldy, eńbek quraldaryn – 9 488, tehnologııalyq jabdyqtardy satyp alýǵa – 15 678, úı-jaıdy jalǵa alýǵa – 656 berildi.

Kóptegen qazaqstandyqtar grant alyp, ózderiniń bıznes-jobalaryn tabysty iske asyrýda. Osyndaı mysaldardyń biri Almaty oblysynyń turǵyny Janar Imanbaeva boldy, ol 400 AEK kóleminde memlekettik grant aldy. Kópbalaly ana «Hadısha dámderi» JK tirkep, qural-jabdyqtar satyp alyp, jartylaı fabrıkattar shyǵaratyn tseh ashty.

«Men 2023 jyly «Bastaý Bıznes» jobasy boıynsha oqýdan sátti ótip, sertıfıkat aldym. «Muzdatylǵan jartylaı fabrıkattar» jobasyn qorǵap, grant aldym. Bólingen aqshaǵa qajetti quraldar-jabdyqtar satyp aldym. Búgingi tańda meniń tsehymda 5 adam jumys isteıdi. Jartylaı fabrıkattardy usyný úshin mektep ashanalarymen 4 kelisim-shart jasaldy. Men memleketke múmkindik úshin alǵys aıtamyn, bolashaqta óz bıznesimdi keńeıtýdi josparlap otyrmyn», – dep bólisti áıel.

Taǵy bir sátti mysal – elordalyq Bota Turarbaeva. 2023 jyly «Bastaý Bıznes» jobasy aıasynda kásipkerlik negizderin meńgerip, konkýrsqa qatysyp, 400 AEK kóleminde grant utyp aldy. Alǵan aqshaǵa jemis-jıdekterdi, táttilerdi sýblımatsııalaýǵa arnalǵan qural-jabdyqtar satyp alyp, qazirgi tańda azyq-túlik florıstıkasymen aınalysady.

«Úsh balany jalǵyz tárbıelep otyrmyn. Men ustazdyq qyzmette júrgende naýqas balalar men gemoglobıni tómen analardy jıi baıqadym. Men nege dámdi jáne paıdaly táttilerden syılyqtar oılap tappasqa dep oıladym. Dekrettik demalysta bolǵan kezde «Bastaý Bıznes» jobasy boıynsha oqýdy aıaqtap jáne qosymsha azyq-túlik florıstıka kýrsyn oqydym. Alynǵan qarjynyń arqasynda qural-jabdyqtar satyp alyp, jobamdy júzege asyra bastadym», – deıdi Bota Turarbaeva.

Onyń aıtýynsha, óz daǵdylaryn odan ári damytý úshin ol shokolad pen úı zefırin jasaý boıynsha kondıterlik kýrstardan ótti. Qazirgi ýaqytta kásipker óz bıznesin keńeıtip, «Botadan syi» stýdııasyn ashty, sondaı-aq taǵy eki áıeldi jumyspen qamtamasyz etti.

Esterińizge sala keteıik, qaıtarymsyz granttar konkýrstyq negizde halyqtyń áleýmettik osal toptaryna jatatyn azamattarǵa ótinish berilgenge deıin jumyssyz nemese jeke kásipker retinde (tirkeý merzimi úsh jyldan aspaıtyn) tirkelgen jaǵdaıda beriledi.

Granttar tutyný maqsattaryna, kredıttik qaryzdardy óteýge, turǵyn úı jyljymaıtyn múligin satyp alýǵa jáne salýǵa, jer ýchaskelerin satyp alýǵa, aktsızdeletin ónim óndirýge berilmeıdi.

Kelesi jyly 9 myń grant berý kózdelgen.

Aıta keteıik, Atyraý oblysy ákiminiń grantymen joǵary bilim alǵan 13 dáriger jumysqa ornalasty.