2021 jyly Tokıo Olımpıadasy koronavırýsqa qaramastan ótkiziledi – HOK vıtse-prezıdenti
NUR-SULTAN. QazAqparat – Keıinge shegerilgen Tokıo Olımpıadasy kelesi jyly COVID-19 vırýsyna qaramastan ótkiziledi, dep málimdedi Halyqaralyq olımpıada komıtetiniń vıtse-prezıdenti Djon Koýts. Ol Olımpıadanyń 2021 jyldyń 23 shildesinde bastalatynyn rastady, dep habarlaıdy QazAqparat BBC-ge silteme jasap.
Olımpıada osy jazda ótýi kerek edi, biraq pandemııaǵa baılanysty keıinge qaldyryldy. HOK buǵan deıin aıtqanyndaı, endi keıinge qaldyrý degen bolmaıdy.
«Oıyndardyń basty ıdeıasy – Japonııanyń joıqyn tsýnamıden keıin qaıta qalpyna kelýi bolatyn», – dedi Djon Koýts. (Onyń aıtyp otyrǵany 2011 jylǵy jer silkinisi men tsýnamı saldary). «Endi olar týnneldiń sońyndaǵy jaryq, Covid vırýsyn sımvoldyq túrde jeńetin Oıyndar bolmaq».
Shilde aıynda «Tokıo – 2020» uıymdastyrý komıteti jetekshileriniń biri Toshıro Mýto Olımpıada shekteýli aýdıtorııamen ótýi múmkin degen bolatyn. Alaıda oıyn uıymdastyrýshylary sporttyq sharany múldem kórermensiz ótkizýdi qalamaıdy.
Ol Olımpıada oıyndarynyń ashylý jáne jabylý saltanattaryn jeńildetý, sondaı-aq qatysýshy elderdiń delegatsııalary men qyzmetkerleriniń sanyn qysqartý qajet bolýy múmkin ekenin aıtty.
2020 jylǵy Olımpıadaǵa eki júz el men aýmaqtan 11 myńnan astam atlet qatysady dep josparlanǵan bolatyn. Qoldanystaǵy shekteýler olarǵa qalaı áser etetini belgisiz edi, óıtkeni qazirgi ýaqytta Japonııa shekarasy negizinen sheteldikter úshin jabyq.
Toshıro Mýto koronavırýsqa qarsy vaktsına oıyn ótkizýdiń mindetti sharty bolmaıdy dep málimdedi, degenmen medıtsına mamandary vaktsınasyz Olımpıadanyń ótýine kúmán keltiredi.
«Eger vaktsına paıda bolsa, jaqsy jańalyq bolar edi. Degenmen biz vaktsınasyz oıyn ótkize almaımyz dep aıtpaımyz. Sebebi bul mindetti emes», – dedi Mýto.
Sáýir aıynda uıymdastyrý komıtetiniń basshysy Ioshıro Morı eger Olımpıada 2021 jyly ótkizilmese, onda ol múldem ótpeıtinin aıtty.
Mundaı sheshimdi túsindire otyryp, HOK prezıdenti Tomas Bah: «Uıymdastyrý komıtetiniń 3-5 myń adamnan turatyn shtatyn turaqty ustap otyra almaısyń. Jyl saıyn álemdegi barlyq basty sporttyq oqıǵalardyń kúntizbesin de túzetýge kelmeıdi», – dedi.
Pandemııaǵa deıin Olımpıada tek Dúnıejúzilik soǵystarǵa baılanysty toqtatylǵan, biraq eshqashan keıinge qaldyrylmaǵan.
