2021 jyly saýda salasyna qansha ınvestıtsııa salyndy

NUR-SULTAN. QazAqparat – QR Saýda jáne ıntegratsııa mınıstri Baqyt Sultanov saýda salasyndaǵy ınvestıtsııalar týraly aıtty, dep habarlaıdy QazAqparat tilshisi.

«Jyl basynan ınvestıtsııalyq belsendiliktiń aıtarlyqtaı jandanǵanyn baıqadyq. Bıylǵy 5 aıda saýdadaǵy ınvestıtsııa 142 mlrd teńgeni qurap, 2020 jylǵy tıisti kezeńnen 20,1 paıyzǵa artyq boldy», - dedi B. Sultanov onlaın rejımde halyq aldynda esep berýi kezinde.

Osy oraıda ol halyqty jumyspen qamtýda saýda salasy mańyzdy orynda ekenin jetkizdi. Saladaǵy belsendiliktiń jandanýy jumysshylar sanynyń ósimine múmkindik berdi.

«2020 jylǵy qańtar-naýryz kezeńimen salystyrǵanda, tek birinshi toqsanda jumyspen qamtylǵandar sany 20,8 myńǵa artty. Qazir saýda salasynda 1,5 mln adam qyzmet etip jatyr, bul óz kezeginde elde jumys isteıtinderdiń 16,6 paıyzy», - dedi mınıstr.