2021 jyly Prezıdent tapsyrmalaryn oryndaýǵa 1,6 trln teńge qarastyrylyp otyr
«Prezıdenttiń Joldaýda bergen tapsyrmalaryn oryndaý tıisti qarjyny qajet etedi. Bıylǵy respýblıkalyq bıýdjette tıisti qarjy qarastyrylǵan. Mysaly, tez salynatyn 13 jańa ınfektsııalyq aýrýhanaǵa 30 mlrd teńge eskerilgen. Úkimet rezervinen tabysy az otbasylardyń balalary úshin kompıýterlik tehnıkany satyp alýǵa 70 mlrd teńge bólindi. Qazirgi kezde 2020 jylǵy bıýdjetti naqtylaý aıasynda qosymshy shyǵystardy qamtamasyz etý boıynsha jumystar júrgizilýde», - dedi ol Úkimet úıindegi ótken baspasóz máslıhatynda.
Osy oraıda medıtsına qyzmetkerlerine qosymsha ústemaqy, dári-dármek satyp alý men basqa da qajettilikter qamtylǵan. Aldyn ala esepteýler boıynsha bıylǵa qosymsha qajettilik shamamen 300 mlrd teńgeni quraýy múmkin.
«2021 jyldyń bıýdjetinde Joldaýdaǵy Prezıdent tapsyrmalaryn oryndaýǵa 1,6 trln teńge qarastyrylǵan. Birinshi kezekte medıtsına qyzmetkerleriniń, muǵalimderdiń eńbekaqysyn kóterý, shaǵyn jáne orta bıznestiń nesıe boıynsha paıyzdyq stavkasyn sýbsıdııalaý, respýblıkalyq mańyzdaǵy joldardyń qurylysy, «Aýyl – El besigi» baǵdarlamasyna, sondaı-aq basqa da baǵyttarǵa arnalǵan shyǵystar eskerilgen. Budan basqa tapsyrmalar turǵysynda memlekettik organdarmen shyǵystar kólemi naqtylanyp jatyr», - dedi QR Premer-Mınıstriniń birinshi orynbasary.
Onyń sózine qaraǵanda, tapsyrmalardy oryndaý aıasynda shyǵyndardy ońtaılandyrý qarastyrylǵan. Sonymen qatar bıýdjetke qosymsha túsimder kóleńkeli ekonomıkany tómendetý boıynsha jumystardan qamtamasyz etiledi.
