2021 jyly Qazaqstanǵa 18 mln astam vaktsına dozasy jetkizildi

NUR-SULTAN. QazAqparat – QR Densaýlyq saqtaý mınıstrligi sanıtarlyq-epıdemıologııalyq baqylaý komıtetiniń resmı ókili Erjan Baıtanaev halyqty koronavırýs ınfektsııasyna qarsy vaktsınalaý jumystary týraly aıtyp berdi, dep habarlaıdy QazAqparat.

«Qazirgi ýaqytta respýblıka boıynsha koronavırýs ınfektsııasyna qarsy vaktsınalaýdy uıymdastyrý jáne júrgizý jumystary jalǵasýda. 2021 jylǵy aqpannan bastap óńirlerge 18,5 mln astam vaktsına dozasy jetkizildi, onyń ishinde І komponentke 9,4 mln doza jáne ІІ komponentke 9,1 mln doza vaktsına bar. Ázirge respýblıka boıynsha birinshi komponentpen – 7 884 798 adam egildi, ıaǵnı tıisti kontıngenttiń 79,1%-y qamtyldy, ekinshi komponentpen 6 942 756 adam (69,6%) vaktsınalandy», - dedi Erjan Baıtanaev.

Onyń aıtýynsha, QR Densaýlyq saqtaý mınıstrligi jergilikti atqarýshy jáne múddeli memlekettik organdarmen halyqty koronavırýs ınfektsııasyna qarsy ımmýndaý jónindegi keshendi jospardy ázirledi jáne maquldady. Ol koronavırýsqa qarsy vaktsınalaýdy uıymdastyrý, halyqaralyq tájirıbeni zerdeleý, profılaktıkalyq ekpelerdi esepke alýdy tsıfrlandyrý jáne halyqpen vaktsınanyń mańyzy týraly kommýnıkatsııalyq jumysty qamtıdy.

«Keshendi jospar Qazaqstan Respýblıkasy aýmaǵynda koronavırýs ınfektsııasynyń paıda bolýy men taralýyna jol bermeý jónindegi vedomstvoaralyq komıssııanyń 2021 jylǵy 9 aqpandaǵy hattamasymen bekitilgen. Búgingi kúni Keshendi jospardyń barlyq tarmaqtary oryndaldy. Búgingi tańda KVI-ǵa qarsy vaktsınamen qamtý boıynsha Qazaqstan TMD elderi arasynda 2-shi jáne álemniń barlyq elderi arasynda 42-shi orynda tur. Qazaqstanda 9,9 mln adamǵa bes túrli vaktsına dozalary qoljetimdi. Dúnıejúzilik densaýlyq saqtaý uıymy osy ınfektsııaǵa qarsy jyl sońyna deıin halyqtyń 40%-dan astamyn jáne 2022 jyly 70%-yn vaktsınamen qamtýdy usynady», - deıdi E. Baıtanaev.

2021 jylǵy 12 qazanda Qazaqstanda koronavırýs ınfektsııasyna qarsy vaktsınanyń 1-shi komponentin 7 915 434 adam, 2-shi komponentin 6 983 073 adam saldyrdy.

Sonymen birge, Qazaqstanda 12-17 jastaǵy balalar men júkti áıelderdi vaktsınalaý jumystary josparlanýda. Osyǵan baılanysty mınıstrlik Pfizer kompanııasymen 2021 jyldyń sońyna deıin 4 mln doza vaktsınany jetkizý boıynsha shartqa qol qoıdy.

Qazirgi ýaqytta respýblıka azamattaryna «Gam-KOVID-Vak» (Spýtnık V), «QazVac», «Hayat-Vax», «KoronaVak» jáne «Sınofarm» syndy bes túrli vaktsına qoljetimdi.