2021 jyly Qaraǵandy óńirinde týrısterdi qandaı jańashyldyqtar kútedi

QARAǴANDY. QazAqparat - Qaraǵandy oblysynda týrıster úshin jańa demalys oryndary paıda bolady. Balqash kýrorttyq aımaǵyn damytýǵa shamamen 30 mlrd teńge jumsalady, dep habarlaıdy QazAqparat tilshisi.

Týrızm salasyndaǵy josparlar týraly óńir basshysy Jeńis Qasymbek onlaın-rejımde ótken halyqpen eseptik kezdesýinde aıtty.

- 2020 jyly syrtqy týrızmniń jabylýy jaǵdaıynda biz ishki týrıstik baǵyttardy damytýdyń qanshalyqty mańyzdy ekenine taǵy da kóz jetkizdik. Bizde úsh týrklaster bar - bul 50 óńirlik jobalar tiziminde turǵan ulttyq jobalardyń ondyǵyna kiretin Balqash, Qarqaraly jáne Ulytaý. Balqash kýrorttyq aımaǵyn damytý úshin bıýdjettik jáne jeke ınvestıtsııalar somasy 30 mlrd teńgeni quraıdy, - dedi oblys ákimi. - Jeke ınvestıtsııalar esebinen toǵyz jańa demalys aımaǵynyń qurylysy bastalady. Rezervte jaǵalaý aımaǵyndaǵy týrıstik ınfraqurylym úshin taǵy 60 ga bos jer bar.

Onyń aıtýynsha, demalys aımaqtary ornalasqan Torańǵalyq jáne Shubar-Túbek kentterinde kommýnaldyq ınfraqurylymnyń qurylysy bastalady. Ótken jyly onda joldar jóndeldi.

Balqashta qalalyq jaǵalaýdy abattandyrý kózdelip otyr. Joba ázirlenýde, sodan keıin qarjylandyrý máselesi sheshiletin bolady.

Balqash óńiriniń týrıstik salasyn qarqyndy damytý jaǵdaıynda qala áýejaıy erekshe ról atqarady. Aerodromnyń ushý-qoný jolaǵy jóndeldi, endigi kezekte aerovokzal men perron ǵımaratyn qaıta qurý tur. Búgingi tańda jobalyq-smetalyq qujattamany ázirleý aıaqtalýda.

Týrıstik sala Qarqaralyda da keńeıýde. Oblys ákiminiń aıtýynsha, bes jeke demalys aımaǵyn ashý josparlanýda. Investıtsııalar 1 mlrd teńgeden asady.

Al Ulytaýda týrıster úshin vızıt-ortalyq salyndy. Aýdanda qasıetti oryndar men kórikti jerlerge aparatyn joldar jóndelýde. Bıyl Joshy hannyń tarıhı-mádenı kesheniniń qurylysy aıaqtalady.

- Týrızmdi damytý bizdiń óńir úshin óte mańyzdy. Eń aldymen, bul ekonomıkany ártaraptandyrý jáne jergilikti halyqtyń ómir súrý sapasyn arttyrýdyń jańa tásili, - dep atap ótti Jeńis Qasymbek.