2021 jyly elimizdegi ana ólimi 22%-ǵa ósti – mınıstrlik

ASTANA. QazAqparat –2020 jyldan bastap ana ólimi kórsetkishiniń ósýi baıqaldy. Mundaı derekter «Ashyq» NQA portalynda jarııalaǵan 2030 jylǵa deıin ana men bala densaýlyǵyn saqtaý qyzmetin damytý tujyrymdamasynda keltirilgen, dep habarlaıdy QazAqparat tilshisi.

«Sońǵy 5 jylda Qazaqstan halqynyń sany 8,8%-ǵa ulǵaıdy jáne byltyr 1 qańtardaǵy jaǵdaı boıynsha 19 122 423 adamdy qurady. Onyń 9 835 645-i (51,4%) áıelder. Bala týa alatyn jastaǵy áıelder sany – 4 417 460, onyń ishinde jasóspirimder (15-17 jas) – 814 523 qurady.

2000 jyldan bastap álemde ana ólimi kórsetkishiniń jyldam tómendeý qarqyny baıqaldy, jylyna 5,5 %-ǵa, Qazaqstanda 6,2 %-ǵa. Elimizde sońǵy 10 jylda ana ólimi serpindi túrde 2,4 esege tómendedi (2009 jylǵy tiri týǵan 100 myńǵa shaqqanda 36,8-den 2019 jyly 13,7-ge deıin)», - dep atalǵan salaǵa taldaý jasalǵan qujatta.

Densaýlyq saqtaý mııstrliginiń málimetinshe, keıingi 10 jyl ishinde ana óliminiń tómendeýine ozyq tehnologııalar, jańa klınıkalyq hattamalardy engizý jáne shuǵyl medıtsınalyq kómek kórsetý sapasynyń jaqsarýy oń yqpal etti.

«Alaıda, 2020 jyldan bastap ana ólimi kórsetkishiniń ósýi baıqaldy. Bul COVID-19 pandemııasymen baılanysty. 2021 jyldyń qorytyndysy boıynsha Qazaqstanda ana ólimi kórsetkishi 22%-ǵa ulǵaıdy. Onyń 70%-na pnevmonııa men koronavırýs ınfektsııasy sebep boldy», - delingen tujyrymdama.

Endi osy 7 jyldyq jospardy oryndaý aıasynda 2030 jylǵa qaraı ana ólimin 100 000 tiri týǵandarǵa shaqqanda 13,0-ge deıin jáne náreste ólimin 1 000 tiri týǵandarǵa shaqqanda 7,1-ge deıin tómendetý kózdelgen.

Tujyrymdama 24 mamyrǵa deıin kópshilik talqylaýda bolady.