2021 jyly elimizde óndiriletin gaz kólemi belgili boldy

NUR-SULTAN. QazAqparat – 2021 jyl suıytylǵan munaı gazyn elektrondyq saýda alańdary arqyly ótkizýge tolyq kóshiriledi. Bul týraly QR Energetıka mınıstrliginiń alqa májilisinde vedomstvo basshysy Nurlan Noǵaev málim etti, dep habarlaıdy QazAqparat tilshisi.

«Mınıstrlik qyzmetiniń basym baǵyttarynyń biri – gaz salasyn damytý jáne gazdandyrý. 2020 jyly gaz óndirý kólemi 55,1 mlrd tekshe metrdi qurady. 2021 jylǵa jospar 55,8 mlrd tekshe metr gazdy quraıdy.

2020 jyldyń qorytyndysy boıynsha suıytylǵan gazdy óndirý 3,2 mln tonnaǵa jetti. 2021 jylǵa jospar - 3,2 mln tonna», - dedi mınıstr.

Onyń aıtýynsha, «Jańa jaǵdaıdaǵy Qazaqstan: is-qımyl kezeńi» atty Prezıdenttiń Qazaqstan halqyna joldaýynyń aıasynda 2021 jyldyń sońyna qaraı suıytylǵan munaı gazyn elektrondyq saýda alańdary arqyly ótkizýge tolyq kóshirý júzege asyrylady. Bul osy salanyń ashyqtyǵy men básekege qabilettiligin qamtamasyz etedi, sondaı-aq bıznes úshin ákimshilik kedergilerdi azaıtý maqsatynda «Gaz jelisi uıymdaryn» akkredıtteý ınstıtýty joıylady.

«Sonymen qatar, 2020 jyldyń qorytyndysy boıynsha taýarlyq gazdy óndirý 30,5 mlrd tekshe metrdi qurady. 2021 jylǵa jospar 30,9 mlrd tekshe metrge jetkizilmek. 2020 jyly 10,7 mlrd tekshe metr kóleminde gaz eksporttaldy. 2021 jylǵa jospar 10,7 mlrd tekshe metrdi quraıdy»,- dedi N. Noǵaev.