2021 jyly ataýly áleýmettik kómekke qansha qarjy qarastyrylǵan
Mınıstr óz sózinde Memleket basshysynyń ashyqtyqty, ádildikti qamtamasyz etý, sondaı-aq eńbekke yntalandyrýdy arttyrý jónindegi tapsyrmasyn iske asyrý aıasynda 2020 jyldan bastap AÁK kórsetýdiń jańa tásilderi engizilgenin eske saldy. Áleýmettik kómek toqsan saıyn taǵaıyndalady, eńbekke qabiletti AÁK alýshylarǵa qoıylatyn talaptar jáne ýchaskelik komıssııalar ınstıtýty kúsheıtiledi, tabysy az otbasylardyń balalaryna kepildendirilgen áleýmettik toptama (áleýmettik toptama) usynylady.
«2020 jyldyń qorytyndysy boıynsha alýshylar sany 184 myń otbasynan 936 myń adamdy qurady, onyń ishinde 600 myń bala (64%), 73,5 myń kópbalaly otbasy», – dedi S. Shápkenov.
Áleýmettik toptamany usyný aıasynda 2020 jyly mektep jasyna deıingi 218 myńnan astam bala azyq-túlik jıyntyǵymen (aı saıyn) jáne gıgıenalyq quraldarmen (toqsan saıyn) qamtamasyz etildi. Oqý kezeńinde 217 myń mektep jasyndaǵy bala tegin tamaqpen jáne jeńildikti jol júrýmen qamtamasyz etildi, al oqý jyly bastalar aldynda mektep formasy men kerek-jaraqtaryn aldy.
Vedomstvo basshysy AÁK aıasynda jumyspen qamtýǵa járdemdesýdiń 43 myńǵa jýyq is-sharasy júzege asyrylǵanyn habarlady. Eńbekke qabiletti áleýmettik kómek alýshylar turaqty jáne ýaqytsha jumys oryndaryna jiberildi, qaıta daıarlaýdan nemese kásipkerlikke oqytýdan ótti, sondaı-aq óz isin ashýǵa jeńildikti mıkrokredıtter men granttar aldy. Nátıjesinde, eńbekke qabiletti AÁK alýshylardyń 74 paıyzdan astamy nemese 201 myńǵa jýyǵy jumys isteıdi jáne jumyspen qamtý is-sharalaryna tartylǵan.
«AÁK-ti iske asyrýǵa (áleýmettik toptamany usynýdy eskere otyryp) 2020 jyly 88,2 mlrd teńge jumsaldy. 2021 jylǵa 122,8 mlrd teńge, onyń ishinde 96,3 mlrd teńge respýblıkalyq bıýdjetten jáne 26,5 mlrd teńge jergilikti bıýdjetten qarastyrylǵan», – dedi mınıstr.
Sonymen qatar, Serik Shapkenov ótken jyly tek Qaraǵandy jáne Aqtóbe oblystary ǵana AÁK tóleýge jergilikti bıýdjetterden keminde 15 paıyz mólsherinde birlesip qarjylandyrýdy qamtamasyz etkenin atap ótti.
«2021 jyly Esep komıtetiniń usynymy boıynsha qosa qarjylandyrý úlesi keminde 20 paıyzdy quraýǵa tıis. Osyǵan baılanysty ákimderdiń orynbasarlarynan AÁK tólemderin birlesip qarjylandyrýdy qamtamasyz etý qajettigine erekshe nazar aýdarýdy suraımyn», – dep atap ótti ol.
Budan bólek mınıstr bıyl Memleket basshysynyń Qazaqstan halqyna Joldaýynda qoıylǵan mindetterdi oryndaý úshin «Áleýmettik ámııandy» pılottyq túrde engizý josparlanǵanyn habarlady. Áleýmettik kómek alýshylar áleýmettik mańyzy bar taýarlardy nemese qyzmetterdi satyp alyp qana qoımaı, alynǵan qarajatty qolma-qol aqshaǵa aınaldyra alady.
«Pandemııa kezeńi áleýmettik ózara is-qımyldyń qalyptasqan modelin ózgertý qajettigin kórsetti. Ótken jyly Jumyspen qamtý ortalyqtarynyń mamandary men halyqtyń tikeleı baılanysyn boldyrmaý úshin biz elektrondyq úkimet portaly arqyly AÁK alýǵa ótinish berýdi engizdik. Bıylǵy jyly osy tetikti bekitip, ótinishterdi berýdi eGov-qa tolyǵymen kóshirýdi josparlap otyrmyz. Sondaı-aq, 2020 jylǵy 1 qazannan bastap biz barlyq óńirlerde Áleýmettik qyzmetter portaly arqyly áleýmettik toptama usyný boıynsha pılotty iske qostyq. Bıyl AÁK týraly Zańǵa tıisti ózgerister engizilgennen keıin Áleýmettik qyzmetter portaly arqyly memlekettik járdemaqyny qamtamasyz etýge kóshý josparlanýda», – dedi Serik Shápkenov.
