2021 jyly ana men balany qoldaýǵa 756 mlrd teńge qarastyrylǵan – Eńbek mınıstri
Onyń aıtýynsha, ana men balany qoldaý áleýmettik kómek pen áleýmettik saqtandyrýdyń kópdeńgeıli júıesi arqyly qamtamasyz etiledi. Jyl basynan bastap balaly otbasylarǵa beriletin barlyq memlekettik áleýmettik járdemaqylar 5%-ǵa arttyryldy.
«Respýblıkalyq bıýdjet qarajaty esebinen memlekettik járdemaqylardyń mynadaı túrleri kózdelgen: bala týǵanda beriletin birjolǵy járdemaqy, 1 jasqa deıingi bala kútimi boıynsha aı saıynǵy járdemaqy, «Altyn alqa», «Kúmis alqa» alqalarymen marapattalǵan nemese buryn «Batyr ana» ataǵyn alǵan, I jáne II dárejeli «Ana dańqy» ordenderimen marapattalǵan kópbalaly analarǵa beriletin aı saıynǵy járdemaqy, kópbalaly otbasylarǵa beriletin járdemaqy jáne kámelettik jasqa tolǵansha múgedektigi bar balanyń, 18 jastan asqan bala kezinen birinshi toptaǵy múgedektigi bar adamnyń kútimi boıynsha járdemaqy», - dep atap ótti Eńbek mınıstri.
Sonymen qatar, jumys isteıtin áıelder úshin memlekettik áleýmettik saqtandyrý qorynan áleýmettik tólemder berý kózdelgen. Júktilikke jáne bosanýǵa baılanysty áleýmettik tólemniń ortasha mólsheri 541,3 myń teńgeni, al bir jasqa deıingi bala kútimi boıynsha aı saıynǵy tólem – 32 myń teńgege jetti.
«Zeınetaqy taǵaıyndaý kezinde áıelderdiń áleýmettik qorǵalýyn arttyrý úshin 3 jasqa deıingi bala kútimi kezeńi eńbek ótiline esepteledi. Sonymen birge, áıelderge 1 jasqa deıingi bala kútimi boıynsha demalys kezeńinde mindetti zeınetaqy jarnalary sýbsıdııalanady. Byltyr ana men balany qoldaýǵa 635 mlrd teńgeden astam qarajat jumsaldy. Bıyl onyń kólemi 756 mlrd teńgege kózdelgen, bul ótken jylǵy kólemnen 19%-ǵa artyq», - deıdi Serik Shápkenov.
