2021 jylǵa deıingi aralyqta eńbek etýge qabiletti jastar sany kúrt azaımaq - S. Ábdenov

ASTANA 7 aqpan. QazAqparat - Búgin QR Eńbek jáne halyqty áleýmettik qorǵaý mınıstrliginiń keńeıtilgen alqa májilisinde atalǵan vedomstvonyń basshysy Serik Ábdenov elimizdiń eńbek naryǵynda sheshim tappaǵan problemalar bar ekenin moıyndady.

Onyń sózine qaraǵanda, jumyssyzdyq deńgeıi 2011 jylmen salystyrǵanda 5,4 paıyzdan 5,2 paıyzǵa deıin tómendegen. Bul kórsetkish TMD elderiniń arasynda eń tómen bolyp sanalady.

«Eńbek naryǵynda serpilis baıqalǵanymen sheshimin tappaǵan problemalar da bar. Atap aıtqanda, eńbek resýrstary sapasynyń tómendigi men jumyspen qamtýdyń tıimsiz tustary»,-dedi mınıstr.

Onyń sózine qaraǵanda, jumyspen qamtylǵandardyń 30 paıyzdan astamynyń kásiptik orta jáne joǵary bilimderi joq. Úshten bir bóligin ózin-ózi jumyspen qamtıtyndar qurap otyr. Sóz sońynda S. Ábdenov eńbek resýrsynda tapshylyq bolady degen boljamdarǵa alańdaýshylyq bildirdi. Máselen, ótken ǵasyrdyń 90 jyldarynda demografııalyq ahýaldyń qıyndaýyna baılanysty 2021 jylǵa deıingi aralyqta eńbek etýge qabiletti jastar sany kúrt azaımaq. Osy rette mınıstrlik jumyspen qamtýdyń saıasatyn jańǵyrtýdyń 6 qadamyn aıqyndap berdi. Birinshisi, qolda bar eńbek resýrstaryn paıdalanýdyń tıimdiligin arttyrý, ekinshi qadam - eńbek naryǵyn retteý tetikterin jetildirý, úshinshisi - eńbek ónimdiligin arttyrýmen qatar, jumys isteıtin adamnyń kásibı mansaby jalǵasyp jatqan kezde eńbek qabileti saqtalýy úshin qolaıly eńbek jaǵdaıyn jasaý, tórtinshi - jumyspen qamtýdyń ónimdiligin yntalandyrý, besinshi qadam - jumyspen qamtylǵan halyqty áleýmettik qamsyzdandyrý júıesin sapaly túrde uıymdastyrý, al sońǵysy áleýmettik kómek kórsetý júıesin jetildirýge negizdelgen.