2021 jyldyń 5 aıynda JІÓ ósimi 1,6 paıyzdy qurady
«Bıyl Qazaqstan ekonomıkasy belsendi túrde qalpyna kelýde. Bes aıdyń qorytyndysy boıynsha jalpy ishki ónimniń ósimi 1,6 paıyzdy qurady. Ekonomıkanyń barlyq salalarynda oń ósim baıqalýda. Respýblıka boıynsha óńdeýshi ónerkásibi ekonomıkanyń negizgi draıverleriniń biri boldy. Sonyń ishinde, mashına jasaý, hımııa ónerkásibi, farmatsevtıka jáne jeńil ónerkásip joǵarǵy ósimdi kórsetti», - dedi Úkimet basshysy.
Onyń atap ótýinshe, qurylys salasy men turǵyn úıdi paıdalanýǵa berý boıynsha ósý qarqyny joǵary. Aýyl sharýashylyǵynda da turaqty ósý qarqyny baıqalady.
«Qyzmet kórsetý salasynda eki aı qatarynan oń ósý serpin belgilendi. Buǵan septigin tıgizgen negizi faktorlar saýda, baılanys, jyljymaıtyn múlikpen operatsııalar, qarjy jáne saqtandyrý qyzmeti salalary boldy. Óndiristik emes salalarda joǵary ınvestıtsııalyq belsendilik baıqalady. Bul ekonomıkany ártaraptandyrý arqyly ornyqty ári sapaly damýy úshin negiz bolady», - dedi ol.
Úkimet basshysynyń atap ótýinshe, negizgi kapıtalǵa ınvestıtsııalardyń ósimi taý-ken óndirý ónerkásibin eskermegende 25,5 paıyzdy qurady.
«Qurylys, óńdeý ónerkásibi, onyń ishinde tamaq ónimderi ónerkásibi, aqparat jáne baılanys, aýyl sharýashylyǵy, saýda, jyljymaıtyn múlikpen operatsııalar jáne kólik salalaryna ınvestıtsııalar eleýli ósti», - dedi Asqar Mamın.
