2021 jyldyń 1 shildesinen Ákimshilik ádilet kodeksi qoldanysqa engiziledi

NUR-SULTAN. QazAqparat - 2021 jyldyń 1 shildesinen Ákimshilik ádilet kodeksi qoldanysqa engiziledi. Bul týraly QR sýdıalarynyń VIII sezinde Joǵarǵy sot tóraǵasy Jaqyp Asanov aıtty, dep habarlaıdy QazAqparat tilshisi.

«Memlekettik organdar jaýapkershilik alǵysy kelmeıdi. Sotqa silteıdi. Óz aktilerin ózgertýge qorqady. «Sotqa baryp, onyń sheshimin alyp kelińizder» deıdi. Ákimshilik ádilet týraly kodekske úlken úmit artyp otyrmyz. Ol 2021 jyldyń 1 shildesinen qoldanysqa engiziledi. Ákimshilik ádilet engizilgen elderde memlekettik organdardyń tártibi men jaýapkershiligi kúrt artqan», - dedi Jaqyp Asanov.

Onyń atap ótýinshe, adaldyqqa shaqyrý keıde nátıjeli bola bermeıdi. Sondyqtan da qatań ádisterdi qolǵa alýǵa týra keledi.

«Qaýipsizdik qyzmetin UQK mamandarymen kúsheıttik. Sybaılas jemqorlyqqa qarsy is-qımyl agenttigimen jumys jolǵa qoıyldy. Nátıjesinde 2018 jyldan beri 28 sýdıa qylmystyq qýdalaý sýbektisi boldy. Bul osyǵan deıingi 8 jyldy qosa alǵannan da kóp. Olardyń ishinde 14-i sottaldy, qalǵandary jumystan shyǵaryldy nemese is áli de sotta qaralyp jatyr», - dedi Joǵarǵy sot tóraǵasy.