2021 jyldan bastap JOO-lar dıplom úshin ózderi jaýap beredi - vıtse-mınıstr
«Qazir barlyq joǵary oqý oryndarynda memlekettik úlgidegi dıplom beriledi. Bul óz kezeginde memlekettik turǵydan kepildik beredi. Al 2021 jyldan bastap bizdiń ýnıversıtetter óz úlgisindegi dıplom bere bastaıdy. Sol arqyly ýnıversıtet dıplom úshin, ózderiniń ataq-abyroıy úshin óz atynan jaýap beretin bolady. Mysaly, Ál-Farabı atyndaǵy QazUÝ dıplomy bolsa, oǵan sol ýnıversıtet jaýap beredi. Sonda jumys berýshi de JOO bilim berý sapasy men deńgeıine qarap túlekterdi jumysqa alatyn bolady», - dedi vıtse-mınıstr Ashat Aımaǵambetov.
Sonymen qatar, Bilim jáne ǵylym mınıstriniń orynbasary JOO sertıfıkattaý máselesine de toqtaldy.
«Búginde qolǵa alynyp jatqan ózgeristerdiń biri - ýnıversıtterdi sertıfıkattaý. Bizde ulttyq biliktilik sheńberi aıasynda professorlyq standarttarǵa súıene otyryp, JOO sertıfıkattaý júıesi bar. Ol ne úshin deseńizder, Qazaqstanda keı mamandyqtar boıynsha dımlom bolǵanymen, ol jumysqa túrýǵa kepildik bermeıdi, ol úshin arnaıy sertıfıkaty bolýy kerek, ásirese medıtsına mamandyqtary boıynsha. Osy maqsatta ýnıversıtetter dıplommen qatar, bitirgen mamandyǵy boıynsha sertıfıkat berýi tıis», -dedi vıtse-mınıstr.
Vıtse-mınıstrdiń aıtýynsha, joǵaryda atalǵan ózgerister elimizdegi JOO-daǵy bilim sapasyn jaqsartyp qana qoımaı, ózara básekelestikti de kúsheıtedi.
Buǵan deıin aıtqanymyzdaı, búgin Qazaqstanda 21 JOO-nyń basyn biriktirgen «Akademııalyq adaldyq lıgasy» qurylǵan bolatyn.