2021 jyldan bastap Almatyda aýadaǵy ozon mólsheri ólshenedi
ALMATY. QazAqparat - 2021 jyldyń 1 qańtarynan bastap Almaty qalasynda alǵash ret aýadaǵy ozon mólsheri ólshenetin bolady, dep habarlaıdy QazAqparat tilshisi.
«Kazgıdromet» RMK baspasóz qyzmetiniń málimetinshe, 2013 jyly Fınlıandııa meteorologııalyq ınstıtýty júrgizgen birlesken ekonomıkalyq zertteý baǵdarlamasynyń usynymy negizinde «Qazgıdromet» RMK qalalar men eldi mekenderde atmosferalyq aýadaǵy ozon mólsheriniń baqylaý jelisin keńeıtý jumysyn júrgizdi.
Kelesi jyldan bastap Almatyda ozonnyń mólsheri tórt avtomatty baqylaý beketinde ólshenedi.
Olar myna mekenjaıda ornalasqan:
- Ahmetov kóshesi, 50, aerologııa stansasy (áýejaı aýdany);
- R. Zorge kóshesi,14, Túrksib aýdanynyń AІІB;
- Janqoja batyr kóshesi, 202, «Shańyraq» shaǵynaýdany, №26 mektep;
- ál-Farabı dańǵyly, Naýaı kóshesiniń qıylysy, «Orbıta» shaǵynaýdany («Zelenstroı»AQ dendropark aýmaǵy).
Sonymen qatar, 2021 jyldyń 1 qańtarynan bastap aýadaǵy ozon kontsentratsııasyn baqylaý Nur-Sultan, Shymkent, Óskemen, Atyraý, Taraz, Oral, Qaraǵandy, Qostanaı, Qyzylorda, Aqtaý, Petropavl, Túrkistan, Pavlodar, Aqsaı, Qulsary, Jańaózen qalalarynda, sondaı-aq Beıneý kentinde jáne «Býrabaı» fondyq monıtorıng stansasynda júrgizile bastaıdy.
«Aldaǵy ýaqytta ozon kórsetkishin «AirKz» mobıldi qosymshasynan jáne «Qazgıdromet» RMK ınteraktıvti kartasynan kórýge bolady» delingen habarlamada.
