2021 jyl – Qazaqstanda balalar men jasóspirimderdiń kitap oqýyn qoldaý jyly
Jıynǵa Mádenıet jáne sport vıtse-mınıstri Nurǵısa Dəýeshov, Qazaqstan Jazýshylar Odaǵynyń Basqarma tóraǵasy Ulyqbek Esdáýlet, jazýshy, jyrshy, dramatýrg Baıanǵalı Álimjanov, QR Ulttyq akademııalyq kitaphana basshysy Úmithan Muńalbaeva, Atyraý oblysy ǵylymı-ámbebap kitaphanasynyń dırektory Sara Іzmuhamedova qatysty.
Mádenıet jáne sport vıtse-mınıstri Nurǵısa Dəýeshov Memleket Basshysy Qasym-Jomart Toqaev ótken jyly Ulttyq qoǵamdyq senim keńesiniń IV otyrysynda balalar men jasóspirimder arasyndaǵy kitap oqý máselesiniń mańyzdylyǵyn atap ótkendigin, Prezıdent bul máseledegi kitaphanalardyń mártebesine nazar aýdara otyryp, elimizdiń barlyq turǵynynyń kúsh-jigerin oqyrman urpaqty tárbıeleýge shaqyrǵandyǵyn aıtty.
«Osyǵan oraı, Qazaqstan Respýblıkasynyń Mádenıet jáne sport mınıstrligi 2021 jyldy «Qazaqstandaǵy balalar men jasóspirimderdiń kitap oqýyn qoldaý jyly»,-dep jarııalaıdy.
Balalar men jasóspirimderdiń kitap oqýyn qoldaý jyly aıasynda ótetin is-sharalar respýblıkanyń barlyq óńirin qamtıtyn bolady»,-dedi Nurǵısa Dáýeshov.
Osydan keıin sóz alǵan Ulyqbek Esdáýlet jazýshylar qaýymy «Balalar jáne jasóspirimder ádebıeti jylyn» qoldaıtynyn jetkizdi.
«Kitap – adamnyń ishki mádenıetin, rýhyn, ultjandylyqty qalyptastyratyn negizgi qural. Osy kitap máselesi, onyń ishinde balalarǵa arnalǵan kitaptar táýelsizdik alǵannan beri kenjelep qalǵany jasyryn emes. Desek te keıingi úsh jylda otandyq baspalardan balalarǵa arnalǵan 364 kitap shyqty. Qazirgi tańda balalar kitaphanasyna 7908 oqyrman tirkelgen. Sońǵy málimetterge súıensek, balalardyń eń kóp oqıtyn kitaby – burynǵy klassıkterdiń shyǵarmalary eken»,-dedi ol.
Al Úmithan Muńalbaeva balalar men jasóspirimder ádebıetiniń damýyna toqtaldy.
Aıta keteıik, búgingi tańda Qazaqstanda 258 balalar men jasóspirimder kitaphanasy jumys isteıdi. Onyń 241-i balalarǵa, 11-i jastarǵa, altaýy balalar men jasóspirimderge arnalǵan.
