2021 saılaý: partııalyq tizimdegi áıelder men jastarǵa arnalǵan kvota qanshalyqty tıimdi

NUR-SULTAN. QazAqparat – Partııalyq tizimdegi áıelder men jastarǵa arnalǵan 30% -dyq kvota qanshalyqty tıimdi ekenin Qazaqstan strategııalyq zertteýler ınstıtýtynyń qoǵamdyq-saıası zertteýler bóliminiń bastyǵy Alýa Joldybalına óz mysalyna súıene otyryp aıtty, dep habarlaıdy QazAqparat tilshisi.

«Bul biz 2019 jyly bastamashylyq etken, biraq 2020 jyly saıası reformalardyń birinshi paketi, saıası partııalar týraly zańǵa jáne saılaý týraly zańǵa engizilgen partııalyq kvotany oryndaıtyn alǵashqy saılaý . Halyqaralyq tájirıbe kórsetkendeı, ol jumys isteıdi. Saılaýǵa áıelder kvotasyn alǵash engizgen elder – Skandınavııa elderi: Norvegııa, Shvetsııa, Islandııa, Danııa. Bul elderde áıelder úshin zańnamalyq kvota bar, sonymen qatar jastar kvotasy bar», - dedi Alýa Joldybalına elordada «Saılaý – 2021: úgit-nasıhat trendteri» taqyrybynda ótken sarapshylar talqylaýynda.

Onyń aıtýynsha, atalǵan elderdiń 25-30 jyldaǵy tájirıbesi kórsetkendeı, áıelderdiń saılaý jáne saıası protsesterge qatysýy jaqsy, oń nátıje kórsetedi.

«Keıbir el sońǵy 20 jylda kvotany kóbeıtti. Mysaly, Norvegııada áıelder kvotasy 50% qurasa, Danııada 40% quraıdy. Bul zańnama bekitilip qoıylǵan. Eýropanyń kóptegen elderi bul kvotalardy partııalyq tizimge engizýge múddeli jáne ony júzege asyrýda», - deıdi sarapshy.