2021 elordada sýıtsıd áreketteri eń kóp tirkelgen jyl boldy
«Kámeletke tolmaǵandardyń sýıtsıdtik áreketterine monıtorıngti medıtsınalyq uıymdardyń derekteri boıynsha óz quzyreti sheginde Nur-Sultan qalasy ákimdiginiń qalalyq psıhıkalyq densaýlyq saqtaý ortalyǵynyń mamandary júrgizedi. Kámeletke tolmaǵan balalardyń sýıtsıd áreketterin qarastyrsaq, sońǵy 5 jylda 380 jaǵdaı tirkelgen. Onyń ishinde 32 oqıǵada kámeletke tolmaǵandardyń ómiri qıyldy», - dedi G. Dosmyrzaeva qalalyq máslıhattyń turaqty komıssııasynyń otyrysynda.
Onyń aıtýynsha, 2017 jyly ózin-ózi óltirýge oqtalýdyń 50 faktisi, 2018 jyly - 44, 2019 jyly - 58, 2020 jyly – 51 jaǵdaı, sondaı-aq 2021 jyly sýıtsıd áreketteriniń eń kóp sany, ıaǵnı 136 jaǵdaıy tirkeldi. Al 2022 jyldyń 4 aıynda qalada kámeletke tolmaǵandar arasynda sýıtsıd boıynsha 41 fakti anyqtaldy. Bıyl tórt aıda ózine qol salý saldarynan bir balanyń ómiri qıyldy.
«Kámeletke tolmaǵandar arasynda sýıtsıd sebepterine qatysty birinshi orynda otbasyndaǵy janjal – 21 jaǵdaı (51,2%), qurbylarymen ári dostarymen janjal – 5 jaǵdaı (12,2%), depressııaǵa baılanysty 1 jaǵdaı tirkeldi», - dedi basqarma ókili.
Onyń sózine qaraǵanda, qazirgi kezde qala emhanalarynda 60 psıholog jumys isteıdi. Qalalyq emhanalardaǵy psıhologtar shtatyn jasaqtaý 80 paıyzdy qurady. Emhana aýmaǵyndaǵy árbir mektepke dáriger bekitilgen.
«2022 jyldyń 4 aıynda shuǵyl psıhologııalyq kómek kabınetine 93 patsıent júgindi, bul 2021 jyldyń sáıkes kezeńimen salystyrǵanda 26 jaǵdaıǵa kóp. 4 jaǵdaıda jasóspirimder ózine qol salý áreketterin jasaǵannan keıin psıhıatrııalyq statsıonarǵa jatqyzyldy. Qazirgi ýaqytta olar ambýlatorııalyq jaǵdaıda kómek alýdy jalǵastyryp jatyr», - dedi Gúlnaz Dosmyrzaeva.
Budan buryn habarlanǵandaı, DDSU statıstıkasyna sáıkes, Qazaqstan sýıtsıd boıynsha 20-orynda tur, al 10-19 jastaǵy jasóspirimder arasynda 10-orynǵa turaqtaǵan.