2020 jyly uıaly baılanystyń 2-býynymen turǵyndary 500-den asatyn barlyq eldi meken qamtylady
ASTANA. QazAqparat - 2020 jyly uıaly baılanystyń 2-býynymen turǵyndary 500-den asatyn barlyq eldi-meken qamtylady. Bul týraly búgin halyqpen eseptik kezdesý ótkizgen QR Aqparat jáne kommýnıkatsııalar mınıstri Dáýren Abaev málim etti, dep habarlaıdy QazAqparat.
«Aldaǵy ýaqytta mınıstrlik qamtý aımaǵyn odan ári keńeıtip, 2020 jylǵa qaraı uıaly baılanystyń ekinshi býynymen turǵyndary 500-den asatyn barlyq eldi-mekendi, sonymen birge respýblıkalyq jáne oblystyq mańyzy bar kólik joldary men temir joldardy qamtamasyz etýdi josparlap otyr. Aýyldyq jerlerdi aıtatyn bolsaq, qazirgi ýaqytta barlyq eldi mekender ınternetke qoly jetimdi»,- dedi mınıstr.
Degenmen ol bul baılanys jelisiniń ýaqyt talaby men aýyl halqynyń suranysyna saı kelmeı otyrǵandyǵyn moıyndady.
«Osyǵan saı biz operatorlarymyzben birlesip, aýyldyq eldi mekenderge optıkalyq-talshyqty jeli tartý jumysyna kiristik. Osy jobanyń aıasynda shamamen 5 mıllıonǵa jýyq adam turatyn 1900 eldi mekendi jyldamdyǵy joǵary ınternetke qosý josparlanýda»,- dedi D. Abaev.
