2020 jyly Ulttyq qordyń aktıvteri qalaı ózgerdi
Óte aýyr jyl bolǵanyna qaramastan, Ulttyq banktiń altyn valıýtalyq aktıvteri $6,7 mlrd-qa nemese tórt ese artyp, jyl sońynda $35,7 mlrd jetti.
«Jyl boıy álemdik naryqtaǵy turaqsyz jaǵdaı kezinde biz altyn baǵasynyń rekordtyq kórsetkishke jetkenine kýá boldyq. Jalpy, 2020 jyl ishinde qundy metall baǵasynyń bir ýntsııasy úshin $1523-dan $1891-ǵa deıin nemese 24% ósti. Osyǵan baılanysty, altyn valıýta qorynyń quramyndaǵy altyn portfeli $4,7 mlrd artty. Altyn valıýta aktıvteriniń quramyndaǵy altynnyń úlken úlesi ózin tolyqtaı aqtady, sol arqyly syrtqy faktorlar nasharlaǵan kezde, altyn valıýta aktıvterin toltyryp, turaqtylyǵyn saqtaýǵa múmkindik berdi. Altyndaǵy aktıvter valıýtadaǵy aktıvterdiń tartymdylyǵyn tómendetpeı, saqtap qalýǵa múmkindik beredi»,- deıdi Álııa Moldabekova.
Altyn portfeliniń ósimi altyn valıýta aktıvterin arttyrǵan jalǵyz faktor emes edi. Máselen, Ulttyq banktegi ekinshi deńgeıli bankterdiń valıýtalyq esepshottary da ulǵaıdy, shamamen $2,6 mlrd. Oń faktorlardyń áserimen $1,4 mlrd shamasyndaǵy memlekettik qaryz tólenip, valıýtalyq ınterventsııalar jasaýǵa múmkindik týdy.
«Jeltoqsandaǵy jaǵdaıǵa jeke toqtalǵym kelip otyr: Ulttyq Banktiń rezervteri $3,2 mlrd artty. Qarashyǵanaq Konsortsıýmynan túsken $1,3 mlrd salyq ótemaqysy men Azııa Damý bankinen alynǵan 0,9 mlrd evro kólemindegi úkimettik qaryzdyń esebinen valıýtalyq túsimderdiń arqasynda rezerv osyndaı kólemde ulǵaıdy. Jeltoqsan aıynda altynnyń baǵasy bir ýntsııasy úshin $1727 deıin qymbattaǵan soń, jeltoqsan aıynda altyn portfeli de $1,6 mlrd kólemine jetti»,- dedi spıker.
Aldyn ala boljam boıynsha, 2020 jyldyń sońynda Ulttyq qordyń aktıvteri $58,7 mlrd bolyp, jyl basynan beri $3,1 mlrd azaıdy. Aktıvterdiń tómendeýine áser etken negizgi sebep – bıýdjetke alynatyn Ulttyq qordyń transferti qorǵa túsetin túsimnen arta tústi.
«Ulttyq Bank 2020 jyly kezekti ret óziniń negizgi mıssııasyn, ıaǵnı, ekonomıka úshin «qaýipsizdik jastyǵy» rólin atqaryp shyqty. Máselen, koronavırýs pandemııasynyń saldarymen kúresý úshin Ulttyq qordan bólingen kepildi transferttiń kólemi 2,07 trln teńgeden 4,77 trln teńgege deıin kóbeıdi. Al, sol aralyqta, munaı baǵasy quldyraǵan soń, jylda Ulttyq qorǵa túsetin túsim bar-joǵy 1,4 trln teńgeni qurady»,- dep atap ótti ol.
Solaı bola tura, Ulttyq qordy basqarýdyń nátıjesi boıynsha jaǵymdy kiris netto-shyǵyndardyń kóp bóligin ótedi.
«2020 jyldyń basyndaǵy koronavırýs pandemııasynyń saldarynan qarjy naryqtarynyń aıtarlyqtaı quldyraýyna qaramastan, Ulttyq Bank Ulttyq qordyń aktıvterin konservatıvti túrde bólýden teń bólý tártibine aýysyp, aktsııalar, korporatıvti oblıgatsııalar men damýshy elderdiń oblıgatsııalary sııaqty táýekeldi bolsa da, kiristi aktıvterdiń úlesin arttyrdy. Altyn portfelin qalyptastyrý baǵytyndaǵy jumystar jalǵasty. Ótken jyly QR Ulttyq qoryna 1 mlrd AQSh dollaryna teń altyn alyndy. Sonyń nátıjesinde, qordyń jınaqtaýshy portfeliniń quramyndaǵy altyn portfeliniń úlesi 4,4% nemese 2,4 mlrd AQSh dollaryna jetti»,- deıdi spıker.
Sonyń arqasynda, Ulttyq qordyń jaǵymdy kirisine qol jetti. Aldyn ala alynǵan málimetterge sáıkes, 2020 jyly Ulttyq qordyń aktıvteri boıynsha ınvestıtsııalyq kiris $4,1 mlrd. dollardy nemese 7,5% qurady.
