2020 jyly salyqtardy qolma-qol aqshasyz tóleý deńgeıi 90 paıyzǵa jetkizilmek
«QR Qarjy mınıstrligi «Búgingi tańda memlekettik kirister organdary kórsetiletin qyzmetterdi tsıfrlandyrýdyń, keıingi jyldary bıýdjetke qolma-qol aqshasyz tólem jasaýdyń yńǵaıly jáne qarapaıym servısterin júzege asyrý úshin is-sharalar júrgizýde. 2019 jyldyń qorytyndysy boıynsha bıýdjetke qolma-qol aqshasyz tólemderdiń úlesi 80 paıyzdy qurady. 2020 jyly salyqtardy qolma-qol aqshasyz tóleý deńgeıin 90 paıyzǵa deıin arttyrý josparlanýda. Osy kórsetkishke qol jetkizý úshin memlekettik kirister komıteti bıýdjetke salyq tóleýdiń yńǵaıly jáne qarapaıym qyzmetterin iske qosty», - deıdi OKQ-da ótken baspasóz máslıhatynda memlekettik kirister komıteti tóraǵasynyń orynbasary Talǵat Mamaev.
Onyń aıtýynsha, bul servıster - salyqtar men áleýmettik tólemderdi tóleý, bereshek somasy, aldaǵy tólemder jáne salyq ámııany. Olardy ártúrli ınternet alańdarda paıdalanýǵa bolady.
«2018 jyldyń shilde aıynan bastap salyq tóleýshiler salyq mólsherin memlekettik kirister komıtetiniń mobıldi qosymshasy men ekinshi deńgeıli bankterdiń mobıldi qosymshalary, elektrondy úkimet portalynda baqylap, tóleı alady. 2019 jyldyń qyrkúıeginen bastap bul portaldar men atalǵan mobıldi qosymshalarda jeke tulǵalar múlik, jer ýchaskesi, kólik quraldary, jeke tabys boıynsha aldaǵy salyqtardy tóleý múmkindigine ıe boldy. Ekinshi deńgeıli bankterdiń mobıldi qosymshalary arqyly tólengen salyq týraly málimet memlekettik kirister komıtetiniń aqparattyq júıesine 2 mınýttyń ishinde kelip túsedi. Buryn bul aqparat 2-3 kúnde bir-aq túsetin. Ýaqytty osyndaı qysqa merzimge qysqartý arqyly taýar shyǵarý úshin qajetti burynǵydaı qujattardy talap etpeýge, bıýdjettegi shottyń jaıy týraly mańyzdy málimetterdi usynýǵa, ósimaqy salmaýǵa, shottardy buǵattan tez bosatýǵa múmkindik berdi», - dedi ol.
