2020 jyly rekordtyq ınvestıtsııalyq kelisimshart jasaldy - SІM

NUR-SULTAN. QazAqparat – 2020 jyly rekordtyq ınvestıtsııalyq kelisimshart jasaldy. Bul QR Syrtqy ister mınıstrliginiń Investıtsııa komıteti tóraǵasynyń mindetin atqarýshy Ardaq Zebeshev málim etti, dep habarlaıdy QazAqparat tilshisi.

«Pandemııa kezinde onlaın rejımge kóshýdiń arqasynda biz 2020 jyly kelisimsharttardyń sany men somasyn saqtap qana qoımaı ony arttyryp, rekordtyq kórsetkishke jetkizdik. Jyl ishinde jalpy somasy 635 mlrd teńgeni quraıtyn 56 ınvestıtsııalyq kelisimshartqa qol qoıyldy. Bul sońǵy 10 jyldyń ishindegi eń joǵarǵy kórsetkish sanalady», - dedi ol Ortalyq kommýnıkatsııalar qyzmetindegi baspasóz máslıhaty barysynda.

Ardaq Zebeshevtiń atap ótýinshe, onyń ishinde jalpy somasy 51,2 mlrd teńgeni quraıtyn 8 kelisimshart óńdeý ónerkásibi salasynda jasalyp otyr.

«Osy is-sharalardyń barlyǵy 2025 jylǵa qaraı negizgi kapıtalǵa salynǵan ınvestıtsııa kólemin jalpy ishki ónimniń 30 paıyzyna, al tikeleı shetel ınvestıtsııasynyń kólemin 30 mlrd dollarǵa deıin jetkizýge septigin tıgizýi qajet», - dedi ol.