2020 jyly opyrylyp qulaǵan Astanadaǵy kópirden taǵy aqaý shyqty
ASTANA. QazAqparat - Áleýmettik jelide elordadaǵy Alash tasjolynda ornalasqan kópirdiń jarylǵany týraly aqparat tarady. Bolǵan jaıtqa qatysty Astana qalalyq kólik jáne jol-kólik ınfraqurylymyn damytý basqarmasy túsinik berdi, dep habarlaıdy QazAqparat tilshisi.
«Alash tasjolyndaǵy «búkir kópir» buǵan deıin apatty dep tanylǵan edi. Osyǵan baılanysty jol ótpesiniń oń jaq bóligi jóndelip, qozǵalys 2022 jyly jazda ashyldy.
Kóldeneń asfaltbeton jabynynyń ishinara deformatsııasy jol ótpesiniń jóndelmegen tusy – sol jaq bóliginde oryn aldy. Osy oraıda jol belgileri qoıylyp, ýchaskeni qalpyna keltirý jumysy júrgizilip jatyr», - delingen taratylǵan aqparatta.
Sondaı-aq habarlamada aıtylǵandaı jol-qurylys jumystary maýsymy bastalysymen qozǵalysty qalpyna keltirý úshin jol ótpesiniń sol jaq bóligin jabý josparlanǵan.
«Kópirdiń zaqymdanýyn eskere otyryp, jol ótpesiniń sol jaǵymen avtokólik qozǵalysy ýaqytsha jabylady. Degenmen kólik quraldary úshin kópirdiń eki jaq bóligimen de qozǵalys qamtamasyz etiledi», - deıdi basqarmadan.
Qosa ketsek, «Ikomek» ortalyǵynyń áleýmettik jelidegi jaýabynda jol tósemin qalpyna keltirý jumysy 15 qańtarǵa deıin júrgiziletini aıtylǵan.
Eske sala keteıik, 2020 jyly atalǵan kópir opyrylyp qulaǵan bolatyn.
Vıdeodan alynǵan kadr
