2020 jyly óńiraralyq yntymaqtastyq forýmy Kókshetaýda ótedi
Forým Qazaqstan men Reseı qalalarynda 2003 jyldan beri turaqty túrde ótip keledi. 2020 jyly óńiraralyq yntymaqtastyq forýmy Kókshetaý qalasynda ótedi. Mundaı usynysty Qazaqstan Prezıdenti Qasym-Jomart Toqaev aıtty.
«Eki eldiń ózara is-qımylynyń mańyzdy baǵyttarynyń biri - ekologııa jáne sol salamen baılanysty máseleler. Ekologııalyq problemalar, ózderińiz biletindeı, memlekettik shekaraǵa qaramaıdy. Biz ekologııa máselesin birige sheshýimiz kerek. Sondyqtan men kelesi forýmnyń taqyrybyn «Ekologııa jáne jasyl ósim salasyndaǵy yntymaqtastyq» dep belgilep, ony 2020 jyly Kókshetaý qalasynda ótkizýdi usynamyn», - dedi Memleket basshysy.
Forýmdy qortyndylaı kele Qasym-Jomart Toqaev úlken kólemde praktıkalyq jumystar atqarylýy kerek ekenin atap ótti.
«Óńiraralyq yntymaqtastyqty keńeıtýdiń perspektıvalary men múmkindikteri naqtylandy, bolashaqtaǵy josparlar aıqyndaldy. Úkimetaralyq deńgeıde de, óńirlerimizde de 20-dan astam yntymaqtastyq týraly kelisim jasaldy. Forýmǵa tek shekaralas oblystardyń ǵana emes, sonymen birge bir-birimen belsendi aralasatyn alys aımaqtardyń delegatsııalary qatysty. Eń bastysy, transshekaralyq jáne óńiraralyq yntymaqtastyqty nyǵaıtý men keńeıtýdiń tıimdi quraly retindegi mańyzdylyǵyn kúsheıtti», - dep túıindedi Memleket basshysy.
Eske sala ketsek, Prezıdent búgin «Shekara mańy yntymaqtastyǵyn damytýdyń ózekti máseleleri» atty Qazaqstan men Reseı arasyndaǵy XVI óńiraralyq yntymaqtastyq forýmyna qatysý úshin Ombyǵa ushyp kelgen bolatyn.