2020 jyly Nur-Sultanda 587 órt bolyp, 20 adam qaza tapqan
NUR-SULTAN. QazAqparat – Nur-Sultan qalasynyń Tótenshe jaǵdaılar departamenti qysqy mezgildegi órt qaýipsizdigi erejelerin eske saldy, dep habarlaıdy QazAqparat tilshisi.
«Statıstıkalyq málimetterge sáıkes, bıyl qala aýmaǵynda 587 órt faktisi tirkeldi. Órt saldarynan 20 adam qaza bolyp, 58 adam jaraqat aldy. Órtterdiń negizgi sebepteri – elektr jelilerin montajdaý jáne paıdalaný kezinde oryn alǵan órt qaýipsizdigin buzýshylyqtar, jylytý peshterin paıdalaný kezindegi buzýshylyqtar jáne adamdardyń otpen abaısyz bolýy. Órtte kóz jumǵan 20 adamnyń 13-i ishimdikke mas bolǵan», - dedi Nur- Sultan qalasy TJD Memlekettik órt baqylaý basqarmasynyń bastyǵy Erkin Otarǵalymuly elorda ákimdiginde ótken brıfıngte.
Departament ókili turmystaǵy órt qaýipsizdigi erejelerin qatań saqtaýǵa keńes beredi.
«Elektr jelilerin paıdalanǵanda olarǵa qosymsha júkteme túsirmeýge, elektr aspaptaryn qoldanǵanda qaýipsizdik erejelerin saqtaýǵa, olardy qaraýsyz qaldyrmaýǵa, qoldan jasalǵan nemese jaramsyz kúıdegi elektr qondyrǵylaryn paıdalanbaýǵa shaqyramyz. Jylytatyn pesh ústine janǵysh materıaldardy, otyndardy, kıim men aıaq kıimdi keptirmeýge jáne peshti kúnine birneshe ret jaǵýǵa keńes beremiz, bul peshti shamadan tys qyzdyrmaýǵa kepildik beredi.
Uıqyǵa keterden 1-1,5 saǵat buryn peshti jaǵyp bitirý kerek. Janyp jatqan peshti baqylaýdy balalarǵa tapsyrmańyz, balalardy jalǵyz qaldyrmańyz, úıde tósekte shylym shekpeńiz jáne balkonnan temeki tuqylyn laqtyrmańyz», - deıdi E. Otarǵalymuly.
