2020 jyly Nur-Sultan qalasynda qansha mektep salynady
NUR-SULTAN. QazAqparat - 2020 jyly Nur-Sultan qalasynda qansha mektep salynady. Bul týraly búgin Ortalyq kommýnıkatsııalar qyzmetindegi baspasóz máslıhatynda elorda ákimi Altaı Kólginov aıtty, dep habarlaıdy QazAqparat tilshisi.
Ákimniń dereginshe, 6 mektep salynǵan. Bul 5 myń oqýshyny oqý ornymen qamtýǵa múmkindik berdi. 2020 jyly 9,5 myń oqýshy ornyna eseptelgen 12 mektep salý jáne paıdalanýǵa berý josparlanyp otyr. Sonymen qatar 12 myń oryndyq 8 mektep salýdy bastaý josparlanǵan.
«Qazir qalada 115 mektep pen 125 myń oqýshy bar. Halyqtyń ósýimen qalada áleýmettik nysandarǵa júkteme ósýde. 8 mektep qazir úsh aýysymdy oqytýmen jumys isteıdi. Úsh aýysymdy oqytýmen baılanysty máseleni sheshý úshin jylyna keminde 10 oqý ornyn salý qajet. 2020 jáne 2021 jyldary 12 mektepten salamyz. Birinshi kezekte mektep qurylysyna arnalǵan oryndar anyqtaldy. Mektepterdiń qurylysyna jeke ınvestorlardy tartamyz. Óńirlik keńeste 22 myń oqýshy ornyna jeke ınvestıtsııa esebinen 22 mektep salý qoldaý tapty», - dedi A.Kólginov.
Onyń aıtýynsha, keshendi jospar aıasynda 5 jyldyq kezeńge 60 myń oryndyq 50 mektep (onyń ishinde 10 mektep qazirgi mektepter aımaǵynda) salý josparlanǵan. Jospardy iske asyrý 2025 jylǵa qaraı mektep oryndaryndaǵy aǵymdaǵy jáne perspektıvalyq qajettilikterdi qamtamasyz etýge múmkindik beredi.
Elordada eńbek etýge qolaıly jaǵdaı jasaý úshin 350 orynǵa eseptelgen muǵalimderge arnalǵan jataqhana salyndy. Oqytýshylyq kadrlardy daıarlaýǵa granttar bólinedi.
