2020 jyly memqyzmetterdiń 90 paıyzy avtomattandyrylady

ASTANA. QazAqparat - 2020 jyly memlekettik qyzmetterdiń 90 paıyzy avtomattandyrylady. Bul týraly búgin Májilistegi «Tsıfrlyq Qazaqstan» memlekettik baǵdarlamasyna arnalǵan Úkimet saǵatynda QR Aqparat jáne kommýnıkatsııalar mınıstri Dáýren Abaev aıtty, dep habarlaıdy QazAqparat tilshisi.

«Memleket basshysy Úkimet aldyna memlekettik qyzmetterdi kórsetý protsesin tolyqtaı avtomattandyrý týraly mańyzdy mindet qoıǵany belgili. Qazirgi ýaqytta barlyq memlekettik qyzmetter tizilimi  741 ataýdy qamtysa, onyń 454-i avtomattandyrylǵan. Osy jyldyń sońyna deıin qosymsha 70 memlekettik qyzmetti avtomattandyrý josparlanyp otyr. 2020 jyly biz bul kórsetkishti 90 paıyzǵa jetkizemiz», - dedi Dáýren Abaev.

Onyń aıtýynsha, áleýmettik-eńbek salasyn tsıfrlandyrý aıasynda elektrondy eńbek bırjasy jumys istep tur. Qazirdiń ózinde onyń qyzmetin 81 myńnan astam jumys berýshi men 373 myń jumys izdeýshi paıdalandy.

«Densaýlyq saqtaý salasyn tsıfrlandyrý aıasynda 700 densaýlyq saqtaý uıymy medıtsınalyq qujattardy qaǵazsyz júrgizip jatyr. Búginde 13,3 mıllıonnan astam adamnyń densaýlyq tarıhy elektrondy densaýlyq pasporty arqyly júrgiziledi. Málimetterdi jınaý, elektrondy baza qurý medıtsınada patsıentterge saýalnama júrgizý, dıagnoz qoıý jáne baqylaý, táýekelderdi boljaý salasyndaǵy startaptardy keleshekte belsendi paıdalanýǵa múmkindik beredi», - dedi Dáýren Abaev.