2020 jyly qoljetimdi turǵyn úı qurylysy kólemin 3 ese ulǵaıtamyz - Altaı Kólginov
NUR-SLTAN. QazAqparat - QR vıtse-premeri Roman Sklıardyń qatysýymen ótken kezdesýde qoljetimdi turǵyn úı qurylysynyń kólemin arttyrý men 2020-2021 jyldary elordanyń problemalyq nysandarynyń máselesin sheshý talqylandy, dep habarlaıdy qalalyq ákimdiktiń baspasóz qyzmeti.
Kezdesýge, sondaı-aq, memlekettik organdardyń, turǵyn úı qurylys jınaq bankiniń jáne qurylys kompanııalarynyń ókilderi qatysty. Premer-Mınıstrdiń orynbasary Roman Sklıar elimizde «Nurly Jer» baǵdarlamasy sátti júzege asyrylyp jatqanyn atap ótti. Ótken jyly 13 mln 130 myń sharshy metr turǵyn úı salyndy.
«Qoljetimdi turǵyn úı segmentin salý úshin barlyq qajetti rezervter bar. Mysaly, «Nurly Jer« baǵdarlamasyna ózgerister engizildi. Turǵyndar tarapynan suranys bar, turǵyn úı qurylysy qarqynyn ulǵaıtý qajet», - dedi ol.
Elorda ákimi Altaı Kólginov ótken jyly 2020-2021 jyldarǵa arnalǵan turǵyn úı qurylysynyń kólemin arttyrý men Memleket basshysynyń tapsyrmalaryn oryndaý aıasynda úlestik qurylys nysandarynyń máselesin sheshý boıynsha daıyndyq jumystary qolǵa alynǵandyǵyn aıtty.
«Turǵyn úı máselesi-basty, mańyzdy baǵyttardyń biri. Ótken jyly kezekte turǵan 2900 azamat páter aldy. Memleket basshysynyń tapsyrmasyna sáıkes bıyl qoljetimdi baspana kólemi 3 ese ulǵaısa, 2021 jyly odan da kóp bolmaq. Úı qurylysy kombınatynyń jumysy kómektesedi-memlekettiń qoldaýynyń arqasynda kásiporynnyń jumysy jańartyldy. Úılerdiń sapasyna nuqsan keltirilmeı, sharshy metrdiń qunyn azaıtýǵa jáne turǵyzý merzimin qysqartýǵa kómektesedi. Birqatar máseleler birlese jumys atqarýdy talap etedi», - dedi A. Kólginov.
2020 jyly jalpy 500 myń sharshy metrden astam turǵyn úı salý josparlanǵan – bul shamamen 8 myń páter. 2021 jyly 8,5 myń páterdi paıdalanýǵa berý josparlanyp otyr.
7800-den astam úlesker páter alyp, qujattaryn rásimdeı alady. 2019 jyly qabyldanǵan sharalardyń arqasynda 10 nysan paıdalanýǵa berildi. (11 úı, 2,5 myń úlesker). Árbir qurylysy uzaqqa sozylǵan nysan boıynsha qadamdyq is-sharalar jospary ázirlendi.
