2020 jyly «Qazposhtada» qansha sálemdeme joǵaldy
NUR-SULTAN. QazAqparat – «Qazposhta» AQ Poshta qyzmetteri jáne E-commerce boıynsha basqarýshy dırektory Álııa Súgirbaeva joǵalǵan poshtalyq jóneltimder týraly suraqqa jaýap berdi, dep habarlaıdy QazAqparat tilshisi.
«Jalpy «Qazposhtaǵa» júginetin klıentterdiń kópshiligi sapasyz taýar salynǵanyn nemese qandaı da bir taýardyń jetpeı turǵanyn aıtady. Sondyqtan, bolashaqta osyndaı problemalyq máselelerdi boldyrmaý úshin barlyq klıentterimizge – Qazaqstan turǵyndaryna ózderin jaqsy qyrynan kórsetken, tekserilgen ınternet-alańdardan, saıttardan ǵana taýar alýǵa keńes beremiz», - dedi Á. Súgirbaeva «Qazposhta» ǵımaratynda ótken brıfıngide.
Onyń aıtýynsha, ótken jyly jalpy sálemdemeler sanynyń 0,004%-y joǵalǵan.
«2020 jyly Qazaqstanǵa turǵyndarymyz tapsyrys bergen 8 mln-nan astam sálemdeme jetkizildi. Onyń ishinde tek 370-i joǵaldy. Árbir joǵalý faktisi boıynsha kompanııanyń qaýipsizdik qyzmeti tekserý júrgizedi, barlyq faktiler anyqtalady jáne QR Zańnamasy aıasynda tıisti sheshimder qabyldanady. Jalpy sálemdemeler arasynda bul 0,004%-dy quraıdy», - dep qorytyndylady spıker.
Aıta keteıik, 10 aqpanda birqatar BAQ-ta elorda turǵyny Ilıa Grıshko týraly sıýjet shyqqan edi. Onda I. Grıshko «Qazposhta» sálemdemesinde ózi tapsyrys bergen uıaly telefonnyń joǵalýyna shaǵymdanǵan.
Bul daýly oqıǵaǵa «Qazposhta» AQ Poshta qyzmetteri jáne E-commerce boıynsha basqarýshy dırektory Álııa Súgirbaeva jaýap bergen edi.
«Qazposhta» kompanııasy sálemdemede joǵalǵan telefon týraly aqparat úshin sotqa júginbek .
