2020 jyly Qazaqstannyń barlyq áýejaıynda jolaqtar jańǵyrtylady
ASTANA. QazAqparat - 2020 jyly Qazaqstannyń barlyq óńirindegi áýejaılarda jolaqtar jańǵyrtylady. Bul týraly búgin QR Indýstrııa jáne ınfraqurylymdyq damý birinshi vıtse-mınıstri Roman Sklıar aıtty, dep habarlaıdy QazAqparat tilshisi.
Mınıstrliktiń keńeıtilgen alqa májilisinde baıandama jasaǵan ol 2018 jyly Semeı qalasy áýejaıynyń aerovokzaly men ushyp-qoný jolaǵyn jańǵyrtý jumystary aıaqtalǵanyn aıtty. Sondaı-aq Petropavl áýejaıynda ushaq turaǵynyń ornyn kóbeıtý úshin perrony keńeıtilgenin eske saldy.
«Qostanaı qalasy áýejaıynyń ushyp-qoný jolaǵyn jańǵyrtý jumysy bastaldy. Ol aǵymdaǵy jyly aıaqtalady. Sonymen qatar bıyl Óskemen men Oral qalalarynyń áýejaılaryn jańǵyrtý bastalady. 2020 jylǵa deıin elimizdegi barlyq áýejaılardyń ushyp-qoný jolaǵyn jańǵyrtýdy aıaqtaý josparlanýda», - dedi R.Sklıar.
Sonymen qatar ol oblys ákimderimen jergilikti áýe jelilerin qalpyna keltirý úshin basymdyǵy bar eldi mekenderdi anyqtaý jumystary júrgizilip jatqanyn atap ótti.
«Qazirgi ýaqytta Úrjar, Zaısan jáne Úsharal jergilikti áýe jelileriniń aerodromdary jumys istep tur. Sonymen qatar Pavlodar oblysynyń Baıanaýyl aýdanyndaǵy aerodromnyń ushyp-qoný jolaǵyna qatty jabyndy tóseý jumystary júrgizilip jatyr», - dedi ol.
