2020 jyly Qazaqstanda tirkelgen kóliktiń jalpy sany belgili boldy
NUR-SULTAN. QazAqparat – 2020 jyly Qazaqstanda 1,3 mıllıonnan astam avtokólik tirkeýge qoıyldy. Bul týraly «QazAvtoÓnerkásip» avtokólik salasyndaǵy kásiporyndar odaǵynan málim etti, dep habarlaıdy QazAqparat.
«Esepti kezeńde ákimshilik polıtsııa organdary 1 369 668 avtokólikti tirkeýge qoıdy. Atalǵan kórsetkish ótken jyldyń sáıkes kezeńinen 8,2 paıyzǵa kem. Onyń ishinde 1 223 677-si birneshe ret tirkelgender úlesinde, ıaǵnı bir adamnan ekinshi adamnyń atyna aýystyrylǵan kólikter sanatyna jatqyzyldy. Bir jyl burynǵy deńgeımen salystyrǵanda 11,7 paıyzǵa tómendedi. Al alǵash ret tirkelgen kólik quraldarynyń sany artyp, 145 991-di qurady. Bul kórsetkish byltyrǵa qaraǵanda 30,8 paıyz joǵary. Osy kórsetkishke 2020 jyly bastapqy ári ýaqytsha tirkeýge qoıylǵan Armenııadan jetkizilgen 17 398 jeńil avtokólik enip otyr», - dep atap kórsetilgen taratylǵan málimette.
2020 jyldyń qorytyndysy boıynsha Qazaqstan aýmaǵynda 73 jeńil elektromobıl tirkelgen.
«QazAvtoÓnerkásiptiń» habarlaýynsha, esepti kezeńde qaıta tirkelgen kólikterdiń úshten ekisinen astamyn (66,9 paıyzy) paıdalaný merzimi 10 jyldan asqan kólikter qamtyǵan.
Atap aıtqanda, 20 jyldan asqandardyń úlesi – 502 798 kólik (41,1 paıyz) bolsa, 11-den 20 jylǵa deıingiler – 25,9 paıyz (316 377 kólik).
Al 4-ten 7 jylǵa deıingiler – 210 415 kólikke (17,2 paıyz), 8-den 10 jylǵa deıingiler – 121 395 kólikke (9,9 paıyz), 1-den 3 jylǵa deıingi kólik sany 60 605-ke jetti. Sonymen qatar, paıdalaný merzimi 1 jylǵa jetpegen kólikterdiń úlesi 1 paıyz (12 087 avtomobıl) boldy.
