2020 jyly Qazaqstanda taraǵan eń tanymal 5 feık
NUR-SULTAN. QazAqparat - Ótken jyl Qazaqstan úshin de, búkil álem úshin de erekshe jyl boldy. Keıbir jeli qoldanýshylary laık pen tanymaldylyqty arttyrý maqsatynda feıkter shyǵaryp, búkil eldi adastyrdy. Stopfake.kz qazaqstandyqtardy alańdatqan eń tanymal bes feık jańalyqty iriktep shyǵardy.
Qashyqtan bilim berý formatyn uzartý
Qashyqtan bilim berý kóp oqýshylar men olardyń ata-anasy úshin qolaısyz boldy. Bul másele áleýmettik jelilerde árdaıym qyzý pikirtalas týdyrady, al Bilim jáne ǵylym mınıstrliginiń jańalyqtary sanaýly saǵattarda-aq basty jańalyqtarǵa aınalyp otyrdy.
Aıta keterlik úrdis, keıbir blogerler «otqa maı quıyp», qashyqtan oqytý 2022 jylǵa deıin uzartyldy degen jalǵan aqparat taratty.
Biraq oqýshylardyń mektepke oralýy eldegi epıdemıologııalyq jaǵdaıǵa ǵana baılanysty ekeni aıtylyp, bul qaýesetter birden joqqa shyǵaryldy.
Zeınet jasynyń ózgerýi
Qashyqtan oqytý sekildi, zeınetkerlikke shyǵý jasy da – Qaznette qyzý talqylanatyn máselelerdiń biri. Qazaqstandyqtardyń zeınetkerlikke shyǵý jasyn tómendetý men ulǵaıtý týraly feıkter jelide turaqty túrde jarııalanyp otyrdy.
Mundaı ózgerister engizý týraly sheshim Eńbek jáne áleýmettik qorǵaý mınıstrliginde jáne densaýlyq saqtaý mınıstri qabyldady dep jatty. Alaıda, bul qaýesetter rastalǵan joq.
Ushaqtar qazaqstandyqtardy hımııalyq zattarmen ýlaıdy
COVID-19 pandemııasy bastalǵaly Qazaqstan halqynyń arasynda hımtreılder teorııasy keńinen tarady – bul eski ańyzǵa sáıkes, ushaqtar eldi mekenderdiń ústinen ýly hımıkattar shashady, bul aýa raıyn baqylaýǵa, ólim-jitimdi arttyrýǵa jáne adamdardy quldyqta ustaýǵa múmkindik beredi.
«Ý shashatyn» ushaqtar týraly habarlamalar StopFake.kz redaktsııasyna elimizdiń túkpir-túkpirinen túsip jatty. Bul teorııany «dáleldeıtin» fotosýretter men vıdeolarda ádette ushaqtardan keıin qalatyn qarapaıym kondensatsııalyq izder, órt sóndirgish ushaqtar shashqan jalyndy basatyn qospalar nemese erekshe pishindegi bulttar beınelengen.
Sondaı-aq, foto men vıdeonyń basym bóligi Qazaqstanda túsirilmegeni anyqtaldy.
Tótenshe jaǵdaı kezindegi 42 500 teńge járdemaqy jaıly feıkter
Qazaqstanda COVID-19 pandemııasyna baılanysty tótenshe jaǵdaı rejımi jarııalanǵannan keıin karantındik shekteýlerge baılanysty jumysynan aırylǵandarda 42 500 teńgeden tólene bastady.
Memleketten «erejelerdi aınalyp ótip» aqsha alýǵa nıetti jáne alaıaqtar úshin azamattardyń seniminen paıda tabý múmkindigi óz nátıjesin berdi – járdemaqy alýdyń standartty emes jáne qosymsha joldary týraly feıkter Qaznette qaptady.
Alaıaqtar belgili bankterdiń atynan paıdalanýshylarǵa 42 500 teńge usynyp, tólem taǵaıyndaý úshin azamattardyń derbes derekterin Teleram-bot arqyly jınaǵan.
Jazylýshylar sanyn kóbeıtpek bolǵan blogerler «taǵaıyndaýdan avtomatty túrde bas tartý» jáne tólemdi mindetti túrde qaıtarý, tipti árbir qazaqstandyqqa «karantın úshin» 75 000 teńge tólenetini týraly habarlamalar jarııalady.
Karantındi qatańdatý
Qazaqstanda karantınniń engizilýi el turǵyndary úshin úlken synaq boldy jáne bul barlyǵyna da áser etti. Sol sebepti sanıtarlyq talaptardyń ózgerýi, jańa shekteýler men jeńildikter týraly jańalyqtar ózekti boldy.
Osy taqyryptaǵy feık jańalyqtar júıeli túrde paıda boldy. Kóbine qazaqstandyqtardy jańa, neǵurlym qatań shekteýlermen, jekelegen óńirlerdegi jappaı lokdaýndarmen jáne bolashaqta sanıtarlyq normalardy qatańdatý boljamdarymen qorqytty.
