2020 jyly Qazaqstanda 9,8 myń shaqyrym jol jóndelip, jańǵyrtyldy – mınıstrlik

NUR-SULTAN. QazAqparat - Qazaqstannyń avtojol salasynda 2020 jyly aýqymdy jumystar atqaryldy. Qurylys, rekonstrýktsııalaý jáne jóndeý jumystarymen respýblıkalyq jáne jergilikti mańyzy bar joldardyń 9,8 myń shaqyrymy qamtyldy.

Bul týraly QR Indýstrııa jáne ınfraqurylymdyq damý mınıstrliginiń Telegram kanalynan málim boldy, dep habarlaıdy QazAqparat.

Máselen, qurylys jáne jańartý jumystary 4 myń shaqyrym jolǵa júrgizildi. Atap aıtsaq, «Qaraǵandy-Balqash-Burylbaıtal-Qurty», «Aqtóbe-Atyraý-Astrahan», «Taldyqorǵan-Óskemen», «Qalbataý-Maıqapshaǵaı», «Kókshetaý-Petropavl-Korǵan», «Uzynaǵash-Otar», «Merke-Burylbaıtal», «Qostanaı-Denısovka» jáne «Úsharal-Dostyq» jobalary.

Al jóndeý jumystary 1,8 myń shaqyrym respýblıkalyq jelini qamtydy: kúrdeli jóndeý – 433 km, ortasha jóndeý – 1 385 km. Jyl sońynda 2,6 myń shaqyrym avtojolda qozǵalys jandanyp, respýblıkalyq mańyzy bar 1,1 myń shaqyrym tasjolda jóndeý jumystary aıaqtaldy.

Oblystyq jáne aýdandyq mańyzdy joldardyń 4 myń shaqyrymy qamtylyp, jumystar 2,7 myń shaqyrymynda aıaqtaldy.
Budan bólek, 2020 jyly avtomobıl joldaryn ózin-ózi kútip-ustaýǵa kóshirý maqsatynda 5,8 myń shaqyrym jolǵa aqy alý júıesi engizildi. Sondaı-aq, eldiń birqatar óńirinde qoǵamdyq tyńdaýlar ótkizildi.

Jyl qorytyndysy boıynsha avtojoldardyń ulttyq standart talaptaryna sáıkes keletin jol boıyndaǵy servıs nysandarymen qamtamasyz etilýi 58%-ǵa jetkizildi.
Atap ótý kerek, avtojol jobalaryn júzege asyrý barysynda 200 myń adam jumyldyryldy.