2020 jyly Qazaqstan PhD doktorantýra mamandarynyń sanyn 4 esege arttyrady - B.Jumaǵulov
ASTANA. 12 maýsym. QazAqparat - QR Bilim jáne ǵylym mınıstrligi 2020 jylǵa qaraı PhD doktorantýra mamandarynyń sanyn 4 esege arttyrýdy josparlaýda.
Bul týraly búgin Astanada ótken halyqaralyq forýmda QR Bilim jáne ǵylym mınıstri Baqytjan Jumaǵulov málim etti.
"Biz ǵylymı mamandardy daıarlaýǵa asa mańyzdy kóńil bólýdemiz. Sizder bilesizder, Qazaqstan álemde qoldanylyp júrgen bakalavr-magıstr-PhD mamandaryn daıarlaý júıesine kóshti. Osynyń arqasynda ǵylymı kadrlardyń tez qartaıý jáne sanynyń azaıý úderisterine sátti tosqaýyl qoıa aldyq. Ǵylymǵa jastar tartyla bastady. Sondaı-aq eldiń ǵylymı áleýeti sapaly túrde arta tústi. Búginde biz ǵylymı mamandardy daıarlaýdy memlekettiń ındýstrııalandyrý baǵytymen sáıkestendirip otyrmyz. 2020 jylǵa qaraı PhD doktorantýra mamandarynyń sanyn 4 esege arttyrýdy josparlaýdamyz. Osy turǵyda bizdiń joǵary mektebimiz órleý ústinde dep aıta alamyz jáne onyń damýyna biz álemniń aldyńǵy qatarly, eń ozyq tájirıbesin qoldanyp kelemiz", - dep atap ótti mınıstr.
Eske sala keteıik, Astanadaǵy Nazarbaev Ýnıversıtetinde II Eýrazııalyq joǵary bilim kóshbasshylarynyń forýmy ótip jatyr. Bıyl qatysýshylar joǵary bilim berý salasyndaǵy jahandyq ahýal jáne onyń aımaqtaǵy áserin talqylaýda.
