2020 jyly Qaraǵandy oblysynda 260 myńnan astam onkoskrınıng ótkizildi
QARAǴANDY. QazAqparat – Ótken jyly Qaraǵandy oblysy boıynsha 260 myńnan astam onkoskrınıng ótkizildi. Óńir turǵyndarynan qaterli isikti erte anyqtaýǵa medıtsınalyq saqtandyrý qorynan 400 mln teńge baǵyttaldy, dep habarlaıdy QazAqparat tilshisi.
Koronavırýs pandemııasymen baılanysty qıyndyqtarǵa qaramastan, Qaraǵandy oblysynyń emhanalarynda onkoskrınıngter ádettegi rejımde ótýde. Bizdiń óńir turǵyndary úshin obyrdy erte anyqtaýǵa arnalǵan tekserýlerge aqy tóleýge medıtsınalyq saqtandyrý qory ótken jyly 386 mln teńgeden astam qarajat bólgen.
«Engizilgen shekteý is-sharalary, árıne, 100% qamtýǵa múmkindik bermedi, biraq jumys prıntsıpi burynǵydaı qalady. 2021 jyly biz naýqastardy mammografııadan ótýge, onkotsıtologııa men zerthanalyq zertteýlerge jaǵyndy tapsyrýǵa shaqyramyz», - dep túsindiredi «Qaraǵandy qalasynyń №1 Kópbeıindi aýrýhanasy» KMK profılaktıka bóliminiń meńgerýshisi Lıýbov Kovaleva.
2020 jyly №1 kópsalaly aýrýhanada 4 myńǵa jýyq áıel mammografııadan ótti. Olardyń segizinde 1-2 satydaǵy sút beziniń qaterli isigi anyqtaldy, al 118 naýqasta qatersiz isik anyqtaldy. Jatyr moıny obyryn erte anyqtaý úshin kóptegen áıelder tekserýden ótti. 1-shi jáne 3-shi satydaǵy eki qaterli isik anyqtaldy, 100 áıelge isik aldy patologııasy (jatyr moınynyń aýyr jáne jeńil dısplazııasy) dıagnozy qoıyldy.
Sol aýrýhananyń 4 300-den astam patsıenti nájisten jasyryn qan anyqtaý zerthanalyq tekserýinen ótti. Onyń 137-sinde oń nátıje anyqtaldy. Jalpy beıne kolonoskopııa sekildi tolyq tekserýden soń tórt adamda 1-2 satydaǵy qaterli isik anyqtaldy.
«Búgingi tańda halyqty skrınıngtik zertteý boıynsha belsendi jumystar júrgizilýde. Naýryz aıynyń ortasyna qaraı mammografııamen 849 áıel, tsıtologııalyq tekserýmen 940 áıel qamtyldy, kolorektaldy obyrdy erte anyqtaýǵa 675 patsıent tekserildi - olardyń arasynda obyrdyń eki jaǵdaıy jáne asqazan-ishek jolynyń polıpteri jeti adamda anyqtaldy. Medıtsına qyzmetkerleri tarapynan ótkiziletin is-sharalardyń belsendiligine qaramastan, ózin-ózi zertteý jáne patsıentterdiń óz densaýlyǵy úshin ortaq jaýapkershiliginiń bolýy onkopatologııalardy erte anyqtaýdyń eń mańyzdy aspektileriniń biri bolyp tabylady. Keıinge qaldyrylǵan profılaktıkalyq tekserý, ýaqtyly qaramaý, ýaqtyly jete tekserý jáne saýyqtyrý asqynǵan onkologııalyq aýrýlardyń sanyn ulǵaıtyp, emdeý tıimdiligin tómendetedi», - dep atap ótti Lıýbov Kovaleva.
Esterińizge sala keteıik, onkologııalyq aýrýlardy erte anyqtaýǵa skrınıngtik tekserýler júrgizý mindetti áleýmettik medıtsınalyq saqtandyrý paketine jatady. Bul qyzmetter belgili bir jasqa tolǵannan keıin tekserilýge jatatyn saqtandyrylǵan azamattarǵa tegin kórsetiledi.
Búginde Qazaqstanda tegin onkosrınıngtiń úsh túri bar: sút bezi obyryn, jatyr moıny obyryn jáne kolorektaldy obyrdy erte anyqtaýǵa arnalǵan.
