2020 jyly ǵylym salasyn qarjylandyrý kólemi eki esege artady – mınıstr
Forým barysynda halyqaralyq joǵary reıtıngili ǵylymı jýrnaldarda jetistikterin jarııalaıtyn kórnekti qazaqstandyq ǵalymdar «Scopus award – 2019» jalpyulttyq syılyǵyn aldy.
«Ǵalymdar memleket tarapynan marapattalyp jatsa – bir basqa, al mynadaı marapattaý – bir basqa, sebebi bul marapat dúnıejúzindegi áriptesterińizdiń aldynda tanylý degendi bildiredi. Memleket basshysy Qasym-Jomart Toqaev, Elbasy jáne Úkimet ǵylym salasyn damytýǵa úlken mańyz berip otyr. Kelesi jyly ǵylym salasyn qarjylandyrý kólemi eki ese artady», - dedi QR Bilim jáne ǵylym mınıstri Ashat Aımaǵambetov marapattaý rásiminde.
Onyń aıtýynsha, sońǵy eki jylda elimizde jazylǵan ǵylymı jumystar sany 2,5 esege ulǵaıǵan.
«Scopus, Elsevier bazalaryna 100 myń ǵalym kirip, qajetti aqparattardy alýda. Bul – ǵylymdy damytý úshin óte mańyzdy. Biz mamandardy, ǵylymı qyzmetkerlerdi daıyndaý týraly aıtqan kezde bilim berý baǵdarlamalaryna: magıstratýra, doktarantýraǵa, doktarantýradan keıingi ınstıtýttardy damytýǵa úlken kóńil bólemiz. Ótken jyly mańyzdy zań qabyldandy. Onda neni oqytý kerek, qansha kólemde oqý kerektigin budan bylaı Bilim jáne ǵylym mınıstrligi emes, JOO-lardyń ózderi anyqtaıdy. Bul elimizdegi ǵylymnyń damýy úshin mańyzdy nárse dep oılaımyn. Sońǵy eki jylda ǵylymı jumystar sany 2,5 ese ulǵaıdy. Buǵan joǵaryda atalǵan málimetter bazasyna tirkelý de áser etti», - deıdi Ashat Aımaǵambetov.