2020 jyly Eýropa Odaǵynda 238 myń adam las aýadan qaıtys boldy
KOPENGAGEN. QazAqparat – Atmosfera mıkrobólshekteriniń lastanýy 2020 jyly Eýropa Odaǵynda 238 myń adamnyń mezgilsiz ólimine ákeldi. Bul týraly Eýropalyq qorshaǵan orta agenttiginiń (EEA) baıandamasynda aıtylǵan.
Sońǵy bir jylda koronavırýsqa baılanysty ólim-jitim sany taǵy da ósti, dep habarlaıdy QazAqparat Euronews arnasyna silteme jasap.
«DDU usynǵan normalardan asatyn mıkrobólshekter kontsentratsııasynyń joǵarylaýy búkil Eýropa Odaǵy boıynsha 238 myń adamnyń mezgilsiz ólimine ákeldi», - delingen agenttik baıandamasynda.
Bul 2019 jylǵy ókpege tereń engen mıkrobólshekterden merzimsiz qaıtys bolǵan 231 myńǵa jýyq adamnan birshama kóp.
«Ólim-jitimniń artýy sońǵy 20 jyldaǵy turaqty tómendeý tendentsııasyna qarama-qaıshy keledi: 2005 jáne 2020 jyldar aralyǵynda jalpy tómendeý 45% qurady», - delingen zertteýde.
Bul ósimdi kovıdtiń aýanyń lastanýymen baılanysty qatar júretin aýrýlary bar adamdarǵa (ókpe aýrýlary, qaterli isik nemese 2 tıpti qant dıabeti) qatty áser etýimen túsindirýge bolady.
«2020 jyl men 2019 jyldy salystyrsaq, aýanyń lastanýyna baılanysty mezgilsiz ólim PM2.5 mıkrobólshekteri úshin ósti, biraq NO2 azot dıoksıdi men O3 ozony úshin azaıdy», - delingen agenttik zertteýinde.
Negizinen jol qozǵalysy men ónerkásiptik qyzmetten bolatyn ozon (O3) bólshekteri úshin 2020 jyly tendentsııa teris boldy, 24 myńnan sál astam ólim tirkeldi, jylyna 3% tómendedi.
Kólik quraldary men jylý elektr stantsııalary shyǵaratyn azot dıoksıdi (NO2) gazyna keletin bolsaq, 49 myńnan astam mezgilsiz ólim tirkeldi, ıaǵnı bir jyl burynǵyǵa qaraǵanda 22% - ǵa az, bul ishinara koronavırýs pandemııasy kezindegi jol qozǵalysynyń tómendeýimen túsindirilýi múmkin.
Foto: ru.euronews.com
