2020 jyly elordada 3 mln sharshy metr turǵyn úı paıdalanýǵa berildi – Altaı Kólginov
NUR-SULTAN. QazAqparat – 2020 jyly elorda bir trıllıon teńgeden asa rekordtyq ınvestıtsııa tartty. Bul týraly qala turǵyndarymen esep berý kezdesýinde elorda ákimi Altaı Kólginov aıtty, dep habarlaıdy QazAqparat tilshisi.
«2020 jyly koronavırýs pandemııasyna qaramastan, elorda ákimdigi azamattar men qala úshin mańyzdy jobalar úshin jeke ınvestıtsııalardy tartý boıynsha jumystardy toqtatqan joq. Byltyr elordaǵa 1,1 trıllıon teńge tartyldy. Bul 2019 jylǵa qaraǵanda 21,5 paıyzǵa artyq», - dedi ol.
Qala basshysy 2020 jyl ońaı bolmaǵanyn jasyrmady.
«Biraq pandemııanyń ýaqytsha ekenin túsiný kerek. Qalada turǵyn úı men áleýmettik nysandardy, ınfraqurylym jáne taǵy basqalaryn salýdy mindetti túrde jalǵastyrý qajet. Karantın kezinde qurylys jumystary toqtatylǵan joq. Jumystar sanıtarlyq normany qatań saqtaý arqyly júrgizildi. 2020 jyly elordada 3 mln sharshy metr turǵyn úı salynyp, paıdalanýǵa berildi. Bul 2019 jylǵa qaraǵanda eki esege kóp»»,- dedi Altaı Kólginov.
Onyń atap ótýinshe, ótken jyly ModeX úı kombınatynyń jumysy iske qosyldy. Úı kombınattary turǵyn úı qurylysyna kómektesedi jáne qurylystyń ýaqytyn qysqartýǵa, turǵyn úı qunyn tómendetýge, úı sapasyn arttyrýǵa múmkindik beredi.
