2020 jyly aýyl-aımaqta «halyq qatysatyn bıýdjet» engiziledi
«2018 jyldan bastap aýdandyq mańyzy bar qalalarda, aýyldarda, eldi mekenderde, halyq sany 2 myńnan asyp jyǵylatyn aýyldyq okrýgterde jergilikti ózin-ózi basqarýdyń derbes bıýdjeti engizildi. Jergilikti ózin-ózi basqarý bıýdjetteriniń jobasy jáne olardyń atqarylýy týraly esepter jergilikti qoǵamdastyqtyń jıyndary men jınalystarynda turǵyndar tarapynan talqylanady. Jergilikti atqarýshy organdardyń aqparatyna sáıkes, 2018 jyly jergilikti qoǵamdastyqtardyń, onyń ishinde jergilikti ózin-ózi basqarý bıýdjetin talqylaý boıynsha 7 myńnan astam jıyn ótti», - dedi Úkimet basshysy.
Onyń atap ótýinshe, memlekettik organdardyń basshylary men ákimderdiń halyqpen esepti kezdesýi dúrkin-dúrkin ótkizilip turady. Memlekettik basqarýdyń barlyq deńgeıinde bıýdjettik ashyqtyǵy men aıqyndyǵyn arttyrý jumystary da jalǵasady.
«Estıtin memleket» tujyrymdamasyna kóshýdegi mindetterdiń biri - sheshim qabyldaý protsesine halyqty keńinen tartý. Bul Qazaqstan Respýblıkasy Prezıdentiniń saılaýaldy baǵdarlamasynda da aıtylǵan bolatyn. Osyǵan oraı, Nur-Sultan qalasy Saryarqa aýdanynyń bıýdjet jónindegi oń tájirıbesin ózge de óńirlerge taratý josparlanǵan. Qazirgi ýaqytta Úkimet óńir ákimdikterimen birlesip, barlyq qalalarda «halyq qatysatyn bıýdjetti» 2020 jyldan bastap engizý boıynsha ádisterdi daıyndaý jumysyn júrgizip jatyr. Bul úshin jergilikti bıýdjetti ázirleý erejesine tolyqtyrýlar engiziledi. Osy jylydń sońyna deıin ereje bekitiledi», - dedi Asqar Mamın.
Premer-mınıstrdiń atap ótýinshe, aýdandyq mańyzy bar qalalarda, aýyldarda, eldi mekender men aýyldyq okýrgterde «halyq qatysatyn bıýdjet» jergilikti turǵyndarmen jergilikti ózin-ózi basqarý jobalaryn talqylaý arqyly júzege asyrylady.
«Jalpylaı alǵanda qabyldanatyn sharalar memlekettik basqarýdyń ortalyq jáne jergilikti deńgeılerinde bıýdjet ashyqtyǵyn arttyrýǵa septigin tıgizedi», - dedi ol.
