2020 jyly Astanadan Tokıo, Shanhaı jáne Nıý-Iorkke tikeleı áýe reısteri ashylady
ASTANA. QazAqparat - Qazaqstanda 2020 jyldyń jeltoqsan aıyna deıin Tokıo, Shanhaı jáne Nıý-Iork qalalaryna tikeleı áýe reısteri ashylady, dep habarlaıdy «QazAqparat» HAA tilshisi QR normatıvtik quqyqtyq aktileriniń aqparatyq-quqyqtyq júıesiniń «Ádilet» resmı saıtyna silteme jasap.
QR Úkimeti qaýlysyna sáıkes, Astana qalasynda týrızmdi damytý jóninde 2020 jylǵa deıingi jol kartasy bekitilip jatyr.
Naqty osy qujatta 2020 jylǵa deıin Astanadan Tokıo, Shanhaı jáne Nıý-Iork qalalaryna tikeleı áýe reısterin ashý josparlanǵany kórsetilgen. Sonymen birge, 2019 jylǵa deıin ushý geografııasy men reısterdiń sanyn arttyrý úshin shet elderdiń avıatsııalyq bıligimen kelisimderge otyrý kózdelgen.
Jol kartasy boıynsha 2017 jyldyń jeltoqsan aıyna deıin kemshilikterdi anyqtap, negizgi básekelik artyqshylyqtardy aıqyndaý úshin Astana qalasynyń klınıkalaryndaǵy medıtsınalyq qyzmetterdiń jáne sheteldik azamattarǵa kórsetiletin medıtsınalyq qyzmetterdiń saraptamasyn júrgizý kózdelgen. 2018 jyldyń qańtar aıyna deıin sheteldikterge medıtsınalyq qyzmet kórsetetin Astana qalasynyń negizgi densaýlyq saqtaý uıymdarynyń tizimi jasalmaq.
Buǵan qosa 2018 jyldyń 1 toqsanynda medıtsınalyq týrızm men ımportty almastyrý baǵyty boıynsha ınnovatsııalyq medıtsınalyq tehnologııalarǵa qatysty usynystardy engizý josparlanýda. Kelesi jyldyń maýsymyna deıin WMTA uranymen Astanada medıtsınalyq týrızm taqyrybynda halyqaralyq konferentsııa ótkizilmek.
