2020 jyly Astana bir jylda tartylatyn sheteldik ınvestıtsııalar aǵymyn eki eselemek
ASTANA. QazAqparat - Astana 2020 jyly bir jylda tartylatyn sheteldik ınvestıtsııalar kólemin eki eselemek. Bul týraly búgin elorda ákimi Áset Isekeshev Qazaqstannyń Eýropalyq bıznes qaýymdastyǵynyń múshelerimen jáne dıplomatııalyq korpýspen kezdesýde málim etti. Іskerler tikeleı dıalog arqyly elordada bıznesterin damytýǵa qatysty máselelerdi talqylady, dep habarlaıdy qalalyq ákimdiktiń baspasóz qyzmeti.
«Biz developmentke ınvestıtsııa tartýǵa múddelimiz: turǵyn úı qurylysyna, qonaq úıler, meıramhanalar, balalardyń oıyn-saýyq ortalyqtary, saýda úıleri sııaqty nysandardyń qurylysyna, kólik, energetıkalyq qurylymǵa ınvestıtsııa tartýdy kózdep otyrmyz», - dep atap kórsetti Áset Isekeshev.
Sondaı-aq, ol Astana ýrbanıstik damý jolymen kele jatqanyn atap kórsetti. Kólik, medıtsınalyq salalarǵa engizilip jatqan smart-tehnologııalar adamdardyń ómir súrýi úshin qolaıly jaǵdaı jasaýǵa múmkindik beredi. Innovatsııalar memlekettik-jeke menshik áriptestik tetikteri arqyly endiriletin bolady, dedi ol.
Qala ákimi kásipkerlerdi qyzyqtyrǵan saýaldarǵa jaýap berip, basqarmalardyń basshylaryna keıbir máselelerdi qarastyrýdy tapsyrdy.
Qazaqstannyń Eýropalyq bıznes qaýymdastyǵynyń tóraǵasy Aýdrıs Bartsıavıchıýstiń aıtýynsha, kezdesý jemisti ótti.
«Adamdar baılanys ornata ady, al bul Astanada bıznesti damytýǵa jasalǵan qadam», - dedi ol.
Aıta keterligi, Qazaqstannyń Eýropalyq bıznes qaýymdastyǵy - kommertsııalyq emes uıym, qaýymdastyqqa 150 kompanııa kiredi, olardyń arasynda halyqaralyq, eýropalyq jáne qazaqstandyq kompanııalar bar. Uıymnyń negizgi basymdyǵy bıznes pen memleket arasynda qurylymdyq dıalog júrgizý úshin tıimdi alań qurý.
