2020 jyly Almatynyń shetindegi 120 shaqyrym joldyń qurylysy bastalady
Ákimniń aıtýynsha, Almaty ákimdiginiń aldynda turǵan qysqa merzimdi mindet – jaqsy jáne qanaǵattanarlyq jaǵdaıdaǵy joldardyń úlesin 75 paıyzǵa deıin jetkizý. Osy maqsatta búgingi kúni 231 kóshedegi 54 shaqyrym joldyń qurylysy aıaqtalǵan.
«Uzyndyǵy 135 shaqyrym bolatyn 147 kóshedegi joldarǵa ortasha jóndeý jumystary júrgizildi. 2020 jyly Almatynyń shetinde taǵy 120 shaqyrym joldyń qurylysy bastalady», — dep naqtylady Baqytjan Saǵyntaev.
Almatylyqtar úshin eń ózekti máseleniń biri - qoǵamdyq kóliktiń jumysy. Jolaýshylar tasymalynyń sapasyn arttyrý – almatylyqtardyń ómir súrý deńgeıin jaqsartýdaǵy basty mindettiń biri. Osyǵan oraı qala ákimi ońtústik astanadaǵy qoǵamdyq kólik sanyn arttyrylatynyn aıtyp berdi.
«Kommertsııalyq qurylymdar 172 avtobýs satyp aldy. Qala bıýdjeti esebinen gazben júretin taǵy 260 avtobýs alyndy», — dedi qala ákimi.
Baqytjan Saǵyntaev qalada barlyq trolleıbýs jelisin modernızatsııalaý bastalǵanyn aıtady. Ákimdik qoǵamdyq kóliktiń ekologııalyq taza túrine kóshýge jiti nazar aýdaratyn bolady. Mysaly, kólik asa qajet baǵyttarǵa 10 elektrobýs shyǵarylǵan.
