2020 jylǵy jazǵy Olımpıadanyń bıýdjeti eki esege kóbeıedi
ASTANA. QazAqparat - Tokıo 2020 jylǵy jazǵy Olımpıada oıyndaryna bastapqyda josparlanǵan qarjydan eki jarym ese, shamamen 380 mlrd.ıenaǵa (3,7 mlrd.dollardan astam) kóp jumsaýǵa týra keledi. Bul týraly Japonııa astanasynyń úkimeti habarlady dep jazady ITAR-TASS.
Japon bıliginiń málimetinshe, baǵanyń ózgerýi 2011 jyldyń naýryz aıynda oryn alǵan apattyq jaǵdaıdan keıingi qalpyna keltirý jumystarymen baılanysty. Ol kezde eldiń soltústik-shyǵysyndaǵy birqatar eldi mekender men turǵyn alaptary joıylyp ketken bolatyn. Zardap shekken aýdandardaǵy qurylys jumystaryna degen suranys qajetti materıaldar men jumys kúshiniń qymbattaýyna ákelip soqty.
Sondaı-aq Olımpıada nysandary qurylysynyń bastapqy baǵasy tym tómendetilgeni belgili boldy. Máselen, Tokıo buǵazyndaǵy eskekshilerdiń jarysy ótetin aımaqtyń qurylysynyń baǵasyn on esege kóterýge týra keldi.
El bıligi túrli qarjy organdary men áleýetti demeýshilermen júrgizilgen kelissózderdiń arqasynda 410 mlrd.ıena (4 mlrd.dollardan astam) qajetti somany qamtamasyz etkenin málim etti. Aıtýlarynsha, bul soma 2020 jylǵy jazǵy Olımpıada oıyndaryn uıymdastyrýǵa jetkilikti.
Aıta keteıik, Tokıo 2020 jylǵy jazǵy Olımpıada oıyndaryn ótkizý quqyǵyn ótken jyly 8 qyrkúıekte jeńip alǵan bolatyn. Japonııa astanasymen birge baıraqty básekeni ótkizýge Madrıt pen Ystambul qalalary talasqa túsken bolatyn.
