2020 jylǵa turǵyn úı-kommýnaldyq sharýashylyǵyn damytý jónindegi baǵdarlamanyń úsh negizgi baǵyty aıqyndaldy - S. Nokın
A. Aqpannyń 2-si. QazAqparat /Ernur Aqanbaı/ - 2020 jylǵa deıingi Qazaqstannyń turǵyn úı-kommýnaldyq sharýashylyǵyn damytý jónindegi baǵdarlamanyń úsh negizgi baǵyty aıqyndaldy.
Bul týraly Qurylys jáne turǵyn úı-kommýnaldyq sharýashylyq isteri agenttiginiń keńeıtilgen alqa májilisinde Sergeı Nokın málim etti, dep habarlaıdy QazAqparat.
Onyń aıtýynsha, baǵdarlamanyń birinshi baǵyty qazirgi ınjenerlik jelilerdi jáne kommýnaldyq sektor nysandaryn jańǵyrtý jáne rekonstrýktsııalaýdy qarastyrady. Ekinshisi, eldi mekenderdi sýmen qamtýdy kózdeıdi. Bul rette shaǵyn qalalar halqynyń túgeldeı sapaly aýyzsýǵa qol jetimdiligin qamtamasyz etý Agenttikke júkteletin bolady. Úshinshisi, turǵyn úı-kommýnaldyq sharýashylyǵynyń tıimdiligin arttyrý úshin ınstıtýtsıonaldyq negizdi qurýdy kózdeıdi. Bul úshin turǵyn úı-kommýnaldyq sharýashylyqtyń normatıvtik-quqyqtyq jáne normatıvtik-tehnıkalyq bazasyn jetildirýdi qamtamasyz etý, salalyq ǵylymdy damytý, memleket pen jekemenshik seriktestiginiń mehanızmderin, jańa tehnologııalardy transfertteý, korporatıvtik basqarý ádisterin ázirleý qarastyrylyp otyr.
S. Nokınniń aıtýynsha, Memleket basshysynyń tapsyrmasy boıynsha ázirlenip jatqan baǵdarlamanyń jobasyn Agenttik aǵymdaǵy jylǵy maýsymnyń 1-ne deıin Úkimetke usynatyn bolady.
