2020 jylǵa qaraı ulttyq kitaphana qory tolyǵymen sandyq júıege ótedi - A.Muhamedıuly

ASTANA. QazAqparat - 2020 jylǵa qaraı Qazaqstandaǵy ulttyq kitaphana qory tolyǵymen tsıfrlanady. Bul týraly búgin Parlament Senatyndaǵy kezdesý barysynda Mádenıet jáne sport mınıstri Arystanbek Muhamedıuly málim etti.

Mınıstrdiń aıtýynsha, Mádenıet saıasatynyń tujyrymdamasyn júzege asyrý nátıjesinde 2020 jylǵa qaraı ulttyq kitaphanalyq kitap qoryn 100 paıyz tsıfrlaýǵa qol jetkiziledi. Sonymen birge, halyqtyń kitaphanalarǵa, teatrlarǵa kelý sany 2 ese, mýzeılerge kelý sany 3 ese kóbeıetini kútiledi.

«Mádenıet saıasaty arqasynda elimizde shyǵarmashylyq básekege qabilettilikti damytý jáne daryndylardy ilgeriletý sharalary keńinen qamtylady. Bizdiń negizgi mindetimiz - mádenı murany saqtap, ony keńinen nasıhattaý. Básekege qabiletti jáne tanymal bolatyn mádenı ónimder shyǵarý», - dedi A.Muhamedıuly.

Budan bólek, mınıstr 2025 jylǵa qaraı vırtýaldy mýzeıler jelisin qurý josparlanatynyn atap ótti. Bul úshin mýzeıdegi barlyq qorlar, kontsertter men basqa da tarıhı-mádenı mańyzy joǵary elementter elektrondy formatqa kóshiriledi.