2020 jylǵa qaraı «Qytaı-Qazaqstan-Túrkimenstan-Iran» temirjolymen 700 myńdaı konteıner tasymaldanady

BEIJІŃ. QazAqparat - 2020 jylǵa qaraı Qazaqstannyń temirjol arqyly júk tasymaldaýdan túsetin kirister qurylymynda tranzıt úlesin 50% jetkizý josparlandy. «Qytaı-Qazaqstan-Túrkimenstan-Iran» temirjoly arqyly 700 myńnan astam konteıner tasymaldanbaq. Bul týraly qazaqstandyq jýrnalısterge bergen suhbatynda «Qazaqstan temir joly» UK» AQ vıtse-prezıdenti Qanat Alpysbaev málimdedi.

«Munda «Qytaı-Qazaqstan-Túrkimenstan-Iran» transkontınentaldy baǵytty paıdalanýǵa qyzyǵýshylyq tanytqan kompanııalardyń ókilderi boldy. Birqatar másele, sonyń ishinde Lıanıýngan porttyq qalasynan Bender-Abbas jáne Tegeran qalalaryna deıin júretin konteınerlik poıyzdardyń úzdiksiz júrýi talqylandy», - dedi ol.

Onyń aıtýyna qaraǵanda, bul jobalardy sátti júzege asyrýdyń negizgi faktorlary poıyzdardyń kedergisiz ótýi, sonymen qatar kóliktik-logıstıkalyq qyzmetter jelisiniń keńeıýi bolmaq.

«Qazaqstan temir joly» UK» AQ vıtse-prezıdenti «Qytaı-Qazaqstan-Túrkimenstan-Iran» temirjolynyń múmkindikteri jaıly baıandady.

«Sarapshylardyń baǵalaýynsha, qazir onyń áleýeti jylyna 700 myńnan astam konteınerdi quraıdy. 2020 jylǵa qaraı osy kórsetkishke qol jetkizýdi kózdep otyrmyz», - dep atap ótti Q.Alpysbaev.

Ol Qazaqstan men Qytaıda eki temirjol ótkeli bar ekenin eske saldy. Olar jylyna 40 mln tonnadan astam júkti tasymaldaýǵa múmkindik beredi.

Eske sala keteıik, sharany Qazaqstan men Túrkimenstannyń Qytaıdaǵy Elshilikteri sondaı-aq, «Qazaqstan temir joly» Ulttyq kompanııasy» AQ uıymdastyrǵan. Tanystyrylymǵa 130-dan astam adam qatysty, olardyń arasynda Qazaqstannyń QHR-daǵy Elshisi Shahrat Nuryshev, Túrkimenstannyń Qytaıdaǵy Elshisi Chınar Rýstamova, QHR Shensı provıntsııasyndaǵy Sıan qalasynyń meri Shangýan Tszıtsın, QKP Lıanıýngan qalasyndaǵy partııa komıtetiniń hatshysy jáne atalǵan qala ákimshiliginiń dırektory Ý Itsıao, «Qytaı temirjoldary» kompanııasynyń vıtse-prezıdenti Hýan Mın, Túrkimenstan Temirjol kóligi mınıstrligi marketıng bóliminiń bastyǵy Azat Aryzmedov, «QTJ» UK» AQ-nyń logıstıka jónindegi vıtse-prezıdenti Qanat Alpysbaev, QHR SІM-niń ókilderi, sondaı-aq 40-qa jýyq qytaılyq kólik kompanııalary men BAQ qatysty.

Shara qytaılyq bıznes ókilderiniń úlken qyzyǵýshylyǵyn týdyrdy.