2020 jylǵa qaraı Qazaqstanda 163,5 mln. tonnaǵa jýyq munaı óndirý boljanady - Munaı jáne gaz vıtse-mınıstri
ASTANA. Naýryzdyń 15-i. QazAqparat /Qanat Mámetqazyuly/ - 2020 jylǵa qaraı Qazaqstanda 163,5 mln. tonnaǵa jýyq munaı óndirý boljanady. Búgin «Qazaqstannyń Eýropa elderimen saýda-ekonomıkalyq yntymaqtastyǵynyń perspektıvalary» atty taqyrypta ótken konferentsııa barysynda Munaı jáne gaz vıtse-mınıstri (burynǵy Energetıka jáne mıneraldyq resýrstar mınıstrligi) Áset Maǵaýov osylaı málim etti,
dep habarlaıdy QazAqparat.
«2009 jyly Qazaqstanda munaı óndirý 76,5 mln. tonnany qurady. 2015 jylǵa qaraı elimizdegi munaı óndirý kólemi 97,6 mln. tonnaǵa deıin jetkizý josparlanady, al 2020 jylǵa qaraı bul kórsetkish 163,5 mln. tonnaǵa deıin jýyqtaýy boljanady», dedi Á. Maǵaýov.
Sonymen birge, vıtse-mınıstr ótken jyly munaı óńdeý zaýyttaryn qaıta jańartý baǵdarlamasy qabyldanǵanyn atap ótti. Osyǵan oraı, búgingi kúni Atyraý munaı óńdeý zaýytyn qaıta jańǵyrtýdyń birinshi satysy qolǵa alynǵan. Al Pavlodar men Shymkent zaýyttaryna tehnıkalyq saraptaýlar jasalýda. Bul rette vıtse-mınıstr Pavlodar munaı óńdeý zaýytyn qaıta jańartýǵa qatysty ınvestıtsııany eýropalyq kompanııalar usynyp otyrǵanyn jetkizdi. Onyń aıtýynsha, 2014 jylǵa deıin Qazaqstandaǵy munaı óńdeý salasynda eýro-3 standarty engizilse, 2016 jylǵa qaraı eýro-4 standartyn engizý josparlanady.
