2020 jylǵa qaraı Qazaqstan logıstıkanyń tıimdiligi ındeksi reıtınginde 88-den 40 orynǵa kóteriledi

ASTANA. QazAqparat - Qazaqstan Respýblıkasy kólik júıesiniń ınfraqurylymyn damytýdyń jáne yqpaldastyrýdyń 2020 jylǵa deıingi memlekettik baǵdarlamasy logıstıkanyń tıimdiligi reıtınginde Qazaqstannyń pozıtsııasyn 88-den 40-shy orynǵa deıin jaqsartýǵa múmkindik beredi.

Atap aıtqanda, Dúnıejúzilik Banktiń sońǵy esepteýleri boıynsha búginde elimiz logıstıkany damytý ındeksi boıynsha 88 orynda tur. 2007 jyly Qazaqstan bul reıtıngte 133 orynda bolǵan.

Búgin 10-shy Dúnıejúzilik ıslam ekonomıkalyq forýmynda sóılegen sózinde Memleket basshysy N. Nazarbaev Qazaqstan sheteldik ınvestorlardy tartý úshin barlyq jaǵdaıdy jasap, kólik-logıstıkalyq qurylymdy quryp jatqandyǵyn atap ótti.

Elbasy atqarylǵan jumystardyń arqasynda 10 myń shaqyrymnan asatyn avtomobıl joldary jáne 2,5 myń shaqyrym temir jol salynǵanyn jáne qaıta jóndeýden ótkenin, Qytaıdan Parsy shyǵanaǵyna deıingi qashyqtyq 1200 shaqyrymǵa qysqarǵanyn aıtyp ótti.

Eske sala ketsek, Qazaqstan Respýblıkasy kólik júıesiniń ınfraqurylymyn damytýdyń jáne yqpaldastyrýdyń 2020 jylǵa deıingi memlekettik baǵdarlamasy aıasynda 30 myń shaqyrym avtokólik joldary men 8,2 myń shaqyrym temirjol jelileri qaıta jańartylady jáne jóndeýden ótedi.