2020 jylǵa qaraı Qazaqstan arqyly tranzıttik tasymaldan túsetin kiris 4 mlrd. dollarǵa jetedi
ASTANA. QazAqparat - 2020 jylǵa qaraı Qazaqstan arqyly tranzıttik tasymaldan túsetin kiris 4 mlrd. dollarǵa jetedi. Bul týraly búgin «QDB Lızıng» AQ basqarmasy tóraǵasynyń orynbasary Rınat Ǵapparov málim etti, dep habarlaıdy QazAqparat.
«Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty Joldaýyna sáıkes Úkimetke 2020 jylǵa qaraı tranzıttik tasymal kólemin 7 ese, konteınermen tasymal kólemin 2 mıllıon konteınerge deıin jetkizý, tranzıttik tasymaldan alynatyn kiris kólemin 5,5 ese arttyryp, jylyna 4 mlrd. dollarǵa jetkizý tapsyrmasy berildi»,- dedi ol temir joly fıtıngtik tlatformalaryn shyǵarý jobasyn júzege asyrýǵa arnalǵan baspasóz máslıhaty barysynda.
Ǵapparovtyń atap ótýinshe, mundaı nátıjege qol jetkizýge 2020 jylǵa deıin Qazaqstannyń kólik júıesi ınfraqurylymyn damytý jáne ıntegratsııalaý memlekettik baǵdarlamasynda qarastyrylǵan temir jol júk vagondary parkin jańartý jumystary óz septigin tıgizetin bolady. Atalǵan baǵdarlamada 2020 jylǵa qaraı júk jáne jolaýshylar jyljymaly quramy tozýyn sáıkesinshe 40 jáne 42 paıyzǵa deıin tómendetý kózdelgen. Osyǵan baılanysty 2020 jylǵa qaraı Qazaqstan aýmaǵy arqyly tasymaldanatyn júk kólemi 18,1 mln. tonnaǵa deıin artatyn bolady.
Al sharaǵa qatysqan «QTJ-Ekspress» AQ basqarmasynyń tóraǵasy Dıas Ysqaqovtyń aıtýynsha, Qazaqstan «Chendý-Eýropa» baǵytyndaǵy mańyzdy kólik toraby sanalady. Qytaıdan Eýropaǵa qatynaıtyn poıyzdardyń 80 paıyzdan astamy Shyńjań-Uıǵyr avtonomııalyq ólkesi aýmaǵy men Qazaqstan arqyly ótedi.
